na mah ne kaund bijli ki na shoale ka ujala hai

na mah ne kauñd bijlī kī na sho.ale kā ujālā hai

kuchh is gore se mukhḌe kā jhamkaḌā hī nirālā hai

vo mukhḌā gul sā aur us par jo nāranjī do-shāla hai

ruḳh-e-ḳhurshīd ne goyā shafaq se sar nikālā hai

kan-añkhiyoñ kī nigah guptī ishārat qahr chitvan ke

jo vuuñ dekhā to barchhī hai jo yuuñ dekhā to bhālā hai

kahīñ ḳhurshīd bhī chhuptā hai jī bārīk parde meñ

uThā do muñh se parde ko baḌā parda nikālā hai

khule bāloñ se muñh kī raushnī phūTī nikaltī hai

tumhārā husn to sāhab añdhere kā ujālā hai

na jhamkeñ kis tarah kānoñ meñ us ke husn ke jhumke

idhar bundā udhar jhumkā idhar bijlī kā baalā hai

'nazīr' us sañg-dil qātil pe da.avā ḳhuun kā mat kar

miyāñ jā tujh se yaañ kitnoñ ko us ne maar Daalā hai

na mah ne kaund bijli ki na shoale ka ujala hai

kuchh is gore se mukhDe ka jhamkaDa hi nirala hai

wo mukhDa gul sa aur us par jo naranji do-shaala hai

ruKH-e-KHurshid ne goya shafaq se sar nikala hai

kan-ankhiyon ki nigah gupti ishaarat qahr chitwan ke

jo wun dekha to barchhi hai jo yun dekha to bhaala hai

kahin KHurshid bhi chhupta hai ji barik parde mein

uTha do munh se parde ko baDa parda nikala hai

khule baalon se munh ki raushni phuTi nikalti hai

tumhaara husn to sahab andhere ka ujala hai

na jhamken kis tarah kanon mein us ke husn ke jhumke

idhar bunda udhar jhumka idhar bijli ka baala hai

'nazir' us sang-dil qatil pe dawa KHun ka mat kar

miyan ja tujh se yan kitnon ko us ne mar Dala hai