na mauj-e-baada na zulfon na in ghaTaon ne

na mauj-e-bāda na zulfoñ na in ghaTāoñ ne

mujhe Dasā hai mirī shola-zā navāoñ ne

ġham-e-hayāt se Takrā ke giit ban jaanā

sikhā diyā hai mujhe aap kī duāoñ ne

jo kaj-kulāh-e-dayār-e-tarab haiñ sab kuchh haiñ

mujhe to luuT liyā hai mirī vafāoñ ne

kabhī kabhī to sunā hai hilā diye haiñ mahal

hamāre aise ġharīboñ kī iltijāoñ ne

tumhārā husn ho yā merī shā.erī un ko

amar kiyā hai mohabbat kī ātmāoñ ne

ġham-e-hayāt o ġham-e-dil bahut sahī lekin

koī savāl kiyā hai abhī ghaTāoñ ne

kisī chaman kisī gul-pairahan ke ghar jaa.eñ

mujhī ko taak liyā madh-bharī havāoñ ne

ajiib baat hai maiñ jab bhī kuchh udaas huā

diyā sahārā harīfoñ kī bad-duāoñ ne

maiñ but-kadoñ se maqābir meñ girne vaalā thā

magar sambhāl liyā ḳhush-nazar ḳhudāoñ ne

ḳhabar hai garm ki ik tark-e-lucknow ko 'salām'

asiir kar liyā dillī kī apsarāoñ ne

na mauj-e-baada na zulfon na in ghaTaon ne

mujhe Dasa hai meri shola-za nawaon ne

gham-e-hayat se Takra ke git ban jaana

sikha diya hai mujhe aap ki duaon ne

jo kaj-kulah-e-dayar-e-tarab hain sab kuchh hain

mujhe to luT liya hai meri wafaon ne

kabhi kabhi to suna hai hila diye hain mahal

hamare aise gharibon ki iltijaon ne

tumhaara husn ho ya meri shaeri un ko

amar kiya hai mohabbat ki aatmaon ne

gham-e-hayat o gham-e-dil bahut sahi lekin

koi sawal kiya hai abhi ghaTaon ne

kisi chaman kisi gul-pairahan ke ghar jaen

mujhi ko tak liya madh-bhari hawaon ne

ajib baat hai main jab bhi kuchh udas hua

diya sahaara harifon ki bad-duaon ne

main but-kadon se maqabir mein girne wala tha

magar sambhaal liya KHush-nazar KHudaon ne

KHabar hai garm ki ek tark-e-lucknow ko 'salam'

asir kar liya dilli ki apsaraon ne