na puchh hijr mein jo kuchh hua hamara haal

na pūchh hijr meñ jo kuchh huā hamārā haal

jise na ishq ho vo jaane kyā hamārā haal

yaqīn hai ki kaheñge vo ham-safīroñ se

qafas meñ dekh ga.ī hai sabā hamārā haal

ajab hai is kā jo ab tak nahīñ sunā us ne

fasāna-e-sar-e-bāzār thā hamārā haal

gilā yahī hameñ qāsid se hai ki us gul ko

na ḳhat diyā na zabānī kahā hamārā haal

kabhī to ġhash pe ġhash aa.e kabhī lagī hichkī

tire firāq meñ kyā kyā huā hamārā haal

kahāñ talak na hayā degī ruḳhsat-e-guftār

kabhī to pūchhegā vo mah-laqā hamārā haal

na puchh hijr mein jo kuchh hua hamara haal

jise na ishq ho wo jaane kya hamara haal

yaqin hai ki kahenge wo ham-safiron se

qafas mein dekh gai hai saba hamara haal

ajab hai is ka jo ab tak nahin suna us ne

fasana-e-sar-e-bazar tha hamara haal

gila yahi hamein qasid se hai ki us gul ko

na KHat diya na zabani kaha hamara haal

kabhi to ghash pe ghash aae kabhi lagi hichki

tere firaq mein kya kya hua hamara haal

kahan talak na haya degi ruKHsat-e-guftar

kabhi to puchhega wo mah-laqa hamara haal