na puchh manzar-e-sham-o-sahar pe kya guzri

na pūchh manzar-e-shām-o-sahar pe kyā guzrī

nigāh jab bhī haqīqat se āshnā guzrī

hamāre vāste vīrāni-e-nazar har sū

hamīñ ne dasht sajā.e hamīñ pe kyā guzrī

na jaane kaisī haqīqat kā aa.ina huuñ maiñ

nazar nazar mire nazdīk se ḳhafā guzrī

ye zard ho ga.e kaise hare bhare ashjār

jo log saa.e meñ baiThe the un pe kyā guzrī

ġhurūb hotī rahīñ us kī nekiyāñ din meñ

har ek raat gunāhoñ kī be-sazā guzrī

jalā rahā thā sar-e-shām mish.aleñ koī

tamām raat ulajhtī huī havā guzrī

na dekh pāoge be-manzarī ujāloñ kī

ye raat Dhalne lagī to koī sadā guzrī

na puchh manzar-e-sham-o-sahar pe kya guzri

nigah jab bhi haqiqat se aashna guzri

hamare waste virani-e-nazar har su

hamin ne dasht sajae hamin pe kya guzri

na jaane kaisi haqiqat ka aaina hun main

nazar nazar mere nazdik se KHafa guzri

ye zard ho gae kaise hare bhare ashjar

jo log sae mein baiThe the un pe kya guzri

ghurub hoti rahin us ki nekiyan din mein

har ek raat gunahon ki be-saza guzri

jala raha tha sar-e-sham mishalen koi

tamam raat ulajhti hui hawa guzri

na dekh paoge be-manzari ujalon ki

ye raat Dhalne lagi to koi sada guzri