na rota zar-zar aisa na karta shor-o-shar itna

na rotā zār-zār aisā na kartā shor-o-shar itnā

ilāhī kyā karūñ dard-e-jigar itnā jigar itnā

bulāne ke tarīqe se bulāyā kījiye ham ko

rahe malhūz-e-ḳhātir kam se kam bār-e-digar itnā

vo jitnā mujh se milte haiñ usī milne meñ ḳhūbī hai

kisī se bhī mile to bas mile har ik bashar itnā

tire saath aaj kaise kaise zālim yaad aa.e haiñ

na ro.e the na ro.eñge kabhī ham umr-bhar itnā

vahī log aap ke nazdīk sachche āshiqoñ meñ haiñ

ki jin kī aañkh meñ aañsū nahīñ hai shor-o-shar itnā

baḌe bhole haiñ kyā duniyā meñ bhole aise hote haiñ

unhīñ maiñ kyā samajhtā huuñ na samjhe umr-bhar itnā

nahīñ ma.ashūq to phir kyā balā haiñ koī aafat haiñ

nayā ġhussa hai un kā aaj itnī baat par itnā

vo mujh se kis liye milte haiñ kyā ma.alūm logoñ ko

samajhte hoñge sab un par bhī hai is kā asar itnā

tire āshiq kī sūrat ab to pahchānī nahīñ jaatī

satāte haiñ bhalā is tarah aisā is qadar itnā

kisī sūrat ye shān-e-dilbarī dekhī nahīñ jaatī

mirī āñkheñ bhī le jā aur ik ehsān kar itnā

kisī ko apnī barbādī kā baa.is kyā batā.eñ ham

mohabbat hai burī shai jāntā hai har bashar itnā

luTeroñ kī ban aa.e mujh ko shādī marg ho jaa.e

kahā thā kis ne ai daatā mire dāman ko bhar itnā

zarā bahr-e-ḳhudā insāf kar aur bhūlne vaale

taġhāful sheva-e-māshūq hotā hai magar itnā

nahīñ hai be-ḳhudī hī kī tamannā ham ko ai saaqī

tire mastoñ kā sadqa kuchh zarā sā ghūñT-bhar itnā

adū ham se tumhāre zulm kā shikva nahīñ karte

dikhāte haiñ ki dekho ham bhī rakhte haiñ jigar itnā

mujhe jiine se tum māyūs nā-ummīd hī rakkho

tasallī do magar itnī dilāsā do magar itnā

diyā ḳhat un ko lekin kab diyā jab the vo ġhusse meñ

na samjhā thā payāmī kī samajh itnī hai sar itnā

safī' kyuuñ qadr kā tālib huā hai is zamāne meñ

are kam-baḳht tere paas kab hai māl-o-zar itnā

na rota zar-zar aisa na karta shor-o-shar itna

ilahi kya karun dard-e-jigar itna jigar itna

bulane ke tariqe se bulaya kijiye hum ko

rahe malhuz-e-KHatir kam se kam bar-e-digar itna

wo jitna mujh se milte hain usi milne mein KHubi hai

kisi se bhi mile to bas mile har ek bashar itna

tere sath aaj kaise kaise zalim yaad aae hain

na roe the na roenge kabhi hum umr-bhar itna

wahi log aap ke nazdik sachche aashiqon mein hain

ki jin ki aankh mein aansu nahin hai shor-o-shar itna

baDe bhole hain kya duniya mein bhole aise hote hain

unhin main kya samajhta hun na samjhe umr-bhar itna

nahin mashuq to phir kya bala hain koi aafat hain

naya ghussa hai un ka aaj itni baat par itna

wo mujh se kis liye milte hain kya malum logon ko

samajhte honge sab un par bhi hai is ka asar itna

tere aashiq ki surat ab to pahchani nahin jati

satate hain bhala is tarah aisa is qadar itna

kisi surat ye shan-e-dilbari dekhi nahin jati

meri aankhen bhi le ja aur ek ehsan kar itna

kisi ko apni barbaadi ka bais kya bataen hum

mohabbat hai buri shai jaanta hai har bashar itna

luTeron ki ban aae mujh ko shadi marg ho jae

kaha tha kis ne ai data mere daman ko bhar itna

zara bahr-e-KHuda insaf kar aur bhulne wale

taghaful shewa-e-mashuq hota hai magar itna

nahin hai be-KHudi hi ki tamanna hum ko ai saqi

tere maston ka sadqa kuchh zara sa ghunT-bhar itna

adu hum se tumhaare zulm ka shikwa nahin karte

dikhate hain ki dekho hum bhi rakhte hain jigar itna

mujhe jine se tum mayus na-ummid hi rakkho

tasalli do magar itni dilasa do magar itna

diya KHat un ko lekin kab diya jab the wo ghusse mein

na samjha tha payami ki samajh itni hai sar itna

safi' kyun qadr ka talib hua hai is zamane mein

are kam-baKHt tere pas kab hai mal-o-zar itna