na wo shuur ki lau hai na wo nazar ka charagh

na vo shu.ūr kī lau hai na vo nazar kā charāġh

bujhā paḌā hai baḌī der se hunar kā charāġh

añdherī raat kā dil chīrtā ho jaise koī

chalā hai le ke hathelī pe koī sar kā charāġh

usī kā nuur virāsat hai ibn-e-ādam kī

vo zindagī jise kahte haiñ ham sahar kā charāġh

maiñ apne harf-e-malāmat kā ḳhud shikār huā

ki ghar meñ aag lagī jis se thā vo ghar kā charāġh

ik aane vaale kā hai kab se intizār use

kaho havā se bujhā.e na us ke dar kā charāġh

jo qalb-o-jāñ meñ na soz-e-ḳhulūs ho ai 'nāz'

duā ke taaq meñ kaise jale asar kā charāġh

na wo shuur ki lau hai na wo nazar ka charagh

bujha paDa hai baDi der se hunar ka charagh

andheri raat ka dil chirta ho jaise koi

chala hai le ke hatheli pe koi sar ka charagh

usi ka nur wirasat hai ibn-e-adam ki

wo zindagi jise kahte hain hum sahar ka charagh

main apne harf-e-malamat ka KHud shikar hua

ki ghar mein aag lagi jis se tha wo ghar ka charagh

ek aane wale ka hai kab se intizar use

kaho hawa se bujhae na us ke dar ka charagh

jo qalb-o-jaan mein na soz-e-KHulus ho ai 'naz'

dua ke taq mein kaise jale asar ka charagh