na zindagi se shikayat na tum se shikwa hai

na zindagī se shikāyat na tum se shikva hai

mirā libās hī mere lahū kā pyāsā hai

badan ko chhoḌ ke jā.ūñ to ab kahāñ jā.ūñ

janam janam se mirā us ke saath rishta hai

mirā vajūd mirī apnī hī nigāhoñ meñ

libās-e-jism ke hote hue bhī nañgā hai

salīb laao ise surḳh-rū kiyā jaa.e

koī kitāb liye āsmāñ se utrā hai

tumhāre jism meñ maiñ huuñ mire vajūd meñ tum

har ek aadmī ik dūsre meñ zinda hai

tum apne aap se kyoñ ajnabī se lagte ho

tumhāre jism pe 'shādāb' kis kā pahra hai

na zindagi se shikayat na tum se shikwa hai

mera libas hi mere lahu ka pyasa hai

badan ko chhoD ke jaun to ab kahan jaun

janam janam se mera us ke sath rishta hai

mera wajud meri apni hi nigahon mein

libas-e-jism ke hote hue bhi nanga hai

salib lao ise surKH-ru kiya jae

koi kitab liye aasman se utra hai

tumhaare jism mein main hun mere wajud mein tum

har ek aadmi ek dusre mein zinda hai

tum apne aap se kyon ajnabi se lagte ho

tumhaare jism pe 'shadab' kis ka pahra hai