nadir ashya ki jagah chhanT ke lae patthar

nādir ashyā kī jagah chhāñT ke laa.e patthar

ham ne kis shauq se kamre meñ sajā.e patthar

harf-e-haq harf-e-ġhalat karne ko aa.e patthar

maiñ ne sach bol ke har daur meñ khaa.e patthar

ham ne be-faiz chaTānoñ meñ khilā.e gulzār

ham ne zarḳhez zamīnoñ se ugaa.e patthar

roz ubharte rahe dīvār muqābil ban kar

apnī rāhoñ se bahut ham ne haTā.e patthar

kyā ḳhabar kaun se aalam meñ uThī thiiñ nazreñ

maiñ ne dekhā to sitāre nazar aa.e patthar

phuul barsā.e the har ek pe ham ne 'kaifī'

lauT kar ham pe har ik samt se aa.e patthar

nadir ashya ki jagah chhanT ke lae patthar

hum ne kis shauq se kamre mein sajae patthar

harf-e-haq harf-e-ghalat karne ko aae patthar

main ne sach bol ke har daur mein khae patthar

hum ne be-faiz chaTanon mein khilae gulzar

hum ne zarKHez zaminon se ugae patthar

roz ubharte rahe diwar muqabil ban kar

apni rahon se bahut hum ne haTae patthar

kya KHabar kaun se aalam mein uThi thin nazren

main ne dekha to sitare nazar aae patthar

phul barsae the har ek pe hum ne 'kaifi'

lauT kar hum pe har ek samt se aae patthar