nala jidhar mera guzar kar gaya

naala jidhar merā guzar kar gayā

tiir sā har dil meñ asar kar gayā

dil na rahā aap meñ aur maiñ ba-ḳhud

merī taraf jab vo nazar kar gayā

khol ke zulfoñ ke ta.iiñ chehra par

yaar baham shām-o-sahar kar gayā

ahl-e-havas raat galī meñ tirī

jaane se ai shoḳh hazar kar gayā

aur jo mujh sā thā koī jāñ-fishāñ

dar pe tire jī se guzar kar gayā

dekhiyo sābit-qadamī qais kī

ishq meñ kyā umr basar kar gayā

rāh-e-ḳhatarnāk-e-mohabbat ko tai

bā-qadam dīda-e-tar kar gayā

koī thā kūche meñ sanam ke jo aaj

girya-e-ḳhūñ tā-ba-kamar kar gayā

aql pe nāzāñ huuñ 'jahāñdār' kī

dil na diyā us ko hunar kar gayā

nala jidhar mera guzar kar gaya

tir sa har dil mein asar kar gaya

dil na raha aap mein aur main ba-KHud

meri taraf jab wo nazar kar gaya

khol ke zulfon ke tain chehra par

yar baham sham-o-sahar kar gaya

ahl-e-hawas raat gali mein teri

jaane se ai shoKH hazar kar gaya

aur jo mujh sa tha koi jaan-fishan

dar pe tere ji se guzar kar gaya

dekhiyo sabit-qadami qais ki

ishq mein kya umr basar kar gaya

rah-e-KHatarnak-e-mohabbat ko tai

ba-qadam dida-e-tar kar gaya

koi tha kuche mein sanam ke jo aaj

girya-e-KHun ta-ba-kamar kar gaya

aql pe nazan hun 'jahandar' ki

dil na diya us ko hunar kar gaya