nam-e-haq duniya mein raushan kar gaya

nām-e-haq duniyā meñ raushan kar gayā

tasht meñ saj kar jo merā sar gayā

kitne hī chehre savālī ho ga.e

lauT kar jaldī jo apne ghar gayā

jurm ke ehsās kā maarā gayā

raat apne saa.e se bhī Dar gayā

gardish-e-ayyām terā shukriya

mujh meñ ik insān thā so mar gayā

zulm-o-tānā-shāhī ab bhī 'aam hai

kaun kahtā hai ki hitler mar gayā

mujh se barham hai amīr-e-shahr phir

aisā lagtā hai ki ab ke sar gayā

baa'd muddat ke 'salīm' ik roz jab

aa.ina dekhā to ḳhud se Dar gayā

nam-e-haq duniya mein raushan kar gaya

tasht mein saj kar jo mera sar gaya

kitne hi chehre sawali ho gae

lauT kar jaldi jo apne ghar gaya

jurm ke ehsas ka mara gaya

raat apne sae se bhi Dar gaya

gardish-e-ayyam tera shukriya

mujh mein ek insan tha so mar gaya

zulm-o-tana-shahi ab bhi 'am hai

kaun kahta hai ki hitler mar gaya

mujh se barham hai amir-e-shahr phir

aisa lagta hai ki ab ke sar gaya

ba'd muddat ke 'salim' ek roz jab

aaina dekha to KHud se Dar gaya