naseha aaya nasihat hai sunane ke liye

nāsehā aayā nasīhat hai sunāne ke liye

yā ki aayā hai yahāñ tere satāne ke liye

aa ke lāshe pe mire vo ābdīda gar huā

ye bahānā āñsuoñ kā hai bahāne ke liye

tum jo kahte ho ki kyā vo aisī jaldī mar gayā

kyā haiñ barsoñ chāhiyeñ ik jaan jaane ke liye

kyā huā gar maut aa.ī hai vo aane ke liye

kyā huā gar jaañ ga.ī hai vo bhī jaane ke liye

hai faqat parhez ye kah do marīz-e-ishq se

piine ko ḳhūn-e-jigar hai ġham hai khāne ke liye

muñh meñ zāhid ke bhī haiñ do daañt hāthī kī tarah

ik dikhāne ke liye hai ek khāne ke liye

kaun hai zer-e-falak phirtā hai jo apnī ḳhushī

phir rahe haiñ sab jahāñ meñ āb-o-dāne ke liye

peT ke ġham ne kiyā hai sab jahāñ ko muntashir

baap se beTā judā hai āb-o-dāne ke liye

jalva baḳhshā vo mujhe tere ruḳh-e-pur-nūr ne

tuur par muusā gayā thā jis ke paane ke liye

dekh kar aayā hai nāseh kyā jahannam kā azaab

haiñ faqat ye jāhiloñ kā dil Darāne ke liye

rah gayā apnā kaleja thaam jallād-e-falak

jab uThāyā us ne ḳhanjar ḳhuuñ bahāne ke liye

aab to dete ho ḳhanjar ko magar ye soch lo

ḳhuun merā chāhiye us ko bujhāne ke liye

va.ada āshiq se na ho sachchā to jhūTā hī sahī

chāhiye kuchh to tasallī dil baḌhāne ke liye

muñh na dekhā aish kā tadbīr ham ne laakh kī

ġham ghaTāne ke liye farhat baḌhāne ke liye

jab kahā maiñ ne ki kyuuñ bāteñ banāte ho bahut

hañs ke bole bāteñ hotī haiñ banāne ke liye

ai dil-e-nādāñ nahīñ daulat dabāne ke liye

ḳharch kar us ko vo hai khāne khilāne ke liye

jab kahā merā faqat hai ek bose kā savāl

bole daulat husn kī kyā hai luTāne ke liye

hai bulāyā 'mashriqī' ko tum ne jo pesh-e-raqīb

kyā nikālā thā ye nusḳha dil dukhāne ke liye

naseha aaya nasihat hai sunane ke liye

ya ki aaya hai yahan tere satane ke liye

aa ke lashe pe mere wo aabdida gar hua

ye bahana aansuon ka hai bahane ke liye

tum jo kahte ho ki kya wo aisi jaldi mar gaya

kya hain barson chahiyen ek jaan jaane ke liye

kya hua gar maut aai hai wo aane ke liye

kya hua gar jaan gai hai wo bhi jaane ke liye

hai faqat parhez ye kah do mariz-e-ishq se

pine ko KHun-e-jigar hai gham hai khane ke liye

munh mein zahid ke bhi hain do dant hathi ki tarah

ek dikhane ke liye hai ek khane ke liye

kaun hai zer-e-falak phirta hai jo apni KHushi

phir rahe hain sab jahan mein aab-o-dane ke liye

peT ke gham ne kiya hai sab jahan ko muntashir

bap se beTa juda hai aab-o-dane ke liye

jalwa baKHsha wo mujhe tere ruKH-e-pur-nur ne

tur par musa gaya tha jis ke pane ke liye

dekh kar aaya hai naseh kya jahannam ka azab

hain faqat ye jahilon ka dil Darane ke liye

rah gaya apna kaleja tham jallad-e-falak

jab uThaya us ne KHanjar KHun bahane ke liye

aab to dete ho KHanjar ko magar ye soch lo

KHun mera chahiye us ko bujhane ke liye

wada aashiq se na ho sachcha to jhuTa hi sahi

chahiye kuchh to tasalli dil baDhane ke liye

munh na dekha aish ka tadbir hum ne lakh ki

gham ghaTane ke liye farhat baDhane ke liye

jab kaha main ne ki kyun baaten banate ho bahut

hans ke bole baaten hoti hain banane ke liye

ai dil-e-nadan nahin daulat dabane ke liye

KHarch kar us ko wo hai khane khilane ke liye

jab kaha mera faqat hai ek bose ka sawal

bole daulat husn ki kya hai luTane ke liye

hai bulaya 'mashriqi' ko tum ne jo pesh-e-raqib

kya nikala tha ye nusKHa dil dukhane ke liye