nazuk aisa nahin kisi ka peT

nāzuk aisā nahīñ kisī kā peT

maḳhmal-e-rañg-e-gul hai goyā peT

nazar aatā hai aks kurtī kā

aa.ine se bhī hai musaffā peT

dard-e-sar kho diyā sabīhoñ kā

sandal-e-sub.h kā hai taḳhta peT

ye sabāhat ye husn ye jalva

varaq-e-sīm-mah hai saarā peT

naaf hai sāġhar-e-murād ai gul

bāda-e-husn kā hai miinā peT

Dar yahī hai na chhalke sāġhar-e-umr

hai mai-e-nāb kā qarābā peT

jaam ḳhālī nahīñ hai chehre se kam

aaj saaqī ne muft kaaTā peT

tum ne dam de ke jab milāyā phuul

ḳhuub misl-e-habāb phūlā peT

saikḌoñ nigle aadmī us ne

na bharā azhdar-e-zamīñ kā peT

surḳh kurtī se ho gayā ma.alūm

āftāb-e-sahar hai un kā peT

dam nahīñ siine meñ samātā hai

yaad aatā hai un kā gorā peT

dekhne vaale kyuuñ na hoñ majnūñ

rañg meñ hai ezār-e-lailā peT

chhātiyāñ haiñ turanj-e-zar goyā

lauh-e-sīmīñ hai us parī kā peT

laal niifā dikhā ke gardūñ ko

hāla-e-mah kā rañg laayā peT

shaad hote haiñ dekh kar āshiq

sahar-e-īd kā hai naqsha peT

mū-e-mizhgāñ haiñ baal sailī ke

ā.ankhoñ ke sāmne hai terā peT

baat mastī kī hazm ho na sakī

shīsha-e-bāda kā hai halkā peT

jān-o-dil se 'munīr' sadqa hai

nahīñ dekhā hai ab tak aisā peT

nazuk aisa nahin kisi ka peT

maKHmal-e-rang-e-gul hai goya peT

nazar aata hai aks kurti ka

aaine se bhi hai musaffa peT

dard-e-sar kho diya sabihon ka

sandal-e-subh ka hai taKHta peT

ye sabahat ye husn ye jalwa

waraq-e-sim-mah hai sara peT

naf hai saghar-e-murad ai gul

baada-e-husn ka hai mina peT

Dar yahi hai na chhalke saghar-e-umr

hai mai-e-nab ka qaraba peT

jam KHali nahin hai chehre se kam

aaj saqi ne muft kaTa peT

tum ne dam de ke jab milaya phul

KHub misl-e-habab phula peT

saikDon nigle aadmi us ne

na bhara azhdar-e-zamin ka peT

surKH kurti se ho gaya malum

aaftab-e-sahar hai un ka peT

dam nahin sine mein samata hai

yaad aata hai un ka gora peT

dekhne wale kyun na hon majnun

rang mein hai ezar-e-laila peT

chhatiyan hain turanj-e-zar goya

lauh-e-simin hai us pari ka peT

lal nifa dikha ke gardun ko

haala-e-mah ka rang laya peT

shad hote hain dekh kar aashiq

sahar-e-id ka hai naqsha peT

mu-e-mizhgan hain baal saili ke

aaankhon ke samne hai tera peT

baat masti ki hazm ho na saki

shisha-e-baada ka hai halka peT

jaan-o-dil se 'munir' sadqa hai

nahin dekha hai ab tak aisa peT