nahin band-e-qaba mein tan hamara

nahīñ band-e-qabā meñ tan hamārā

hai uryānī hī pairāhan hamārā

rakheñ apne ta.iiñ ham kis tarah dost

ho tujh sā shaḳhs jab dushman hamārā

haiñ ye kāhīda ham ġham se ki juuñ sham.a

hai ek ab jeb aur dāman hamārā

nazar meñ ka.aba kyā Thahre ki yaañ dair

rahā hai muddatoñ maskan hamārā

chaman meñ gar hai tū bulbul to min-ba.ad

haiñ ham aur gosha-e-gulḳhan hamārā

bahār-e-dāġh thī jab dil pe 'qā.em'

ajab sarsabz thā gulshan hamārā

nahin band-e-qaba mein tan hamara

hai uryani hi pairahan hamara

rakhen apne tain hum kis tarah dost

ho tujh sa shaKHs jab dushman hamara

hain ye kahida hum gham se ki jun shama

hai ek ab jeb aur daman hamara

nazar mein kaba kya Thahre ki yan dair

raha hai muddaton maskan hamara

chaman mein gar hai tu bulbul to min-baad

hain hum aur gosha-e-gulKHan hamara

bahaar-e-dagh thi jab dil pe 'qaem'

ajab sarsabz tha gulshan hamara