nahin ki chaara-e-dard-e-nihan nahin malum

nahīñ ki chāra-e-dard-e-nihāñ nahīñ ma.alūm

dil-e-hazīñ ko ho manzūr haañ nahīñ ma.alūm

le aa.ī hai hameñ vahshat kahāñ nahīñ ma.alūm

savād-e-dasht hai yā gulistāñ nahīñ ma.alūm

shahīd-e-nāz kī mayyat chale haiñ dafnāne

magar hai kūcha-e-jānāñ kahāñ nahīñ ma.alūm

hazāroñ ḳhaar chubhe haiñ hamāre talvoñ meñ

qadam haiñ kis liye ab bhī ravāñ nahīñ ma.alūm

subūt-e-ishq meñ ham jaan de to deñ lekin

yaqīñ bhī lā.egā bad-gumāñ nahīñ ma.alūm

azal se loTte añgāroñ par ham aa.e haiñ

hai kab tak aur abhī imtihāñ nahīñ ma.alūm

ilaaj kyā kareñ ham aur kyā batā.eñ haal

kahīñ hai dard magar hai kahāñ nahīñ ma.alūm

jalā dil aur huā raakh muddateñ guzrīñ

ye ab uThā hai kahāñ se dhuāñ nahīñ ma.alūm

na jaane kaun sī manzil pe hai ki gum haiñ havās

dil-e-hazīñ hai kahāñ ham kahāñ nahīñ ma.alūm

chaman meñ ham na ḳhas-o-ḳhār-e-āshiyāñ baaqī

lapak rahī haiñ ye kyuuñ bijliyāñ nahīñ ma.alūm

ġham-o-malāl se paayā kabhī na dil ne farāġh

qafas milā ki hameñ āshiyāñ nahīñ ma.alūm

thī qaid-e-zīst ki āġhosh-e-ġham kisī kī 'jigar'

ye ruuh jaa.e nikal kar kahāñ nahīñ ma.alūm

kahāñ ga.e vo shab-o-roz aur vo māh-o-sāl

kabhī 'jigar' bhī hue the javāñ nahīñ ma.alūm

nahin ki chaara-e-dard-e-nihan nahin malum

dil-e-hazin ko ho manzur han nahin malum

le aai hai hamein wahshat kahan nahin malum

sawad-e-dasht hai ya gulistan nahin malum

shahid-e-naz ki mayyat chale hain dafnane

magar hai kucha-e-jaanan kahan nahin malum

hazaron KHar chubhe hain hamare talwon mein

qadam hain kis liye ab bhi rawan nahin malum

subut-e-ishq mein hum jaan de to den lekin

yaqin bhi laega bad-guman nahin malum

azal se loTte angaron par hum aae hain

hai kab tak aur abhi imtihan nahin malum

ilaj kya karen hum aur kya bataen haal

kahin hai dard magar hai kahan nahin malum

jala dil aur hua rakh muddaten guzrin

ye ab uTha hai kahan se dhuan nahin malum

na jaane kaun si manzil pe hai ki gum hain hawas

dil-e-hazin hai kahan hum kahan nahin malum

chaman mein hum na KHas-o-KHar-e-ashiyan baqi

lapak rahi hain ye kyun bijliyan nahin malum

gham-o-malal se paya kabhi na dil ne faragh

qafas mila ki hamein aashiyan nahin malum

thi qaid-e-zist ki aaghosh-e-gham kisi ki 'jigar'

ye ruh jae nikal kar kahan nahin malum

kahan gae wo shab-o-roz aur wo mah-o-sal

kabhi 'jigar' bhi hue the jawan nahin malum