nahin ki pand-o-nasihat ka qaht paD gaya hai

nahīñ ki pand-o-nasīhat kā qaht paḌ gayā hai

hamārī baat meñ barakat kā qaht paḌ gayā hai

to phir ye radd-e-munājāt kī nahūsat kyuuñ

kabhī sunā ki ibādat kā qaht paḌ gayā hai?

malāl ye hai ki is par koī malūl nahīñ

hamāre shahr meñ hairat kā qaht paḌ gayā hai

suḳhan kā khokhlā honā samajh se bāhar thā

khulā ki harf kī hurmat kā qaht paḌ gayā hai

kahīñ kahīñ nazar aa.e to aa.e misra-e-tar

nahīñ to sher meñ lazzat kā qaht paḌ gayā hai

nasīb dil ko bhalā kab rahī farāvānī

aur ab to vaise bhī muddat kā qaht paḌ gayā hai

magar ab aisī bhī koī andher-nagrī nahīñ

ye Thiik hai ki mohabbat kā qaht paḌ gayā hai

nahīñ maiñ sirf ba-zāhir nahīñ huā vīrān

darūn-e-zāt bhī shiddat kā qaht paḌ gayā hai

kahāñ ga.iiñ mire gaañv kī raunaqeñ 'javvād'

to kyā yahāñ bhī rivāyat kā qaht paḌ gayā hai

nahin ki pand-o-nasihat ka qaht paD gaya hai

hamari baat mein barakat ka qaht paD gaya hai

to phir ye radd-e-munajat ki nahusat kyun

kabhi suna ki ibaadat ka qaht paD gaya hai?

malal ye hai ki is par koi malul nahin

hamare shahr mein hairat ka qaht paD gaya hai

suKHan ka khokhla hona samajh se bahar tha

khula ki harf ki hurmat ka qaht paD gaya hai

kahin kahin nazar aae to aae misra-e-tar

nahin to sher mein lazzat ka qaht paD gaya hai

nasib dil ko bhala kab rahi farawani

aur ab to waise bhi muddat ka qaht paD gaya hai

magar ab aisi bhi koi andher-nagri nahin

ye Thik hai ki mohabbat ka qaht paD gaya hai

nahin main sirf ba-zahir nahin hua viran

darun-e-zat bhi shiddat ka qaht paD gaya hai

kahan gain mere ganw ki raunaqen 'jawwad'

to kya yahan bhi riwayat ka qaht paD gaya hai