nahin mujhko hasrat ma-siwa pas ab uski yaad se kaam hai

nahīñ mujh ko hasrat mā-sivā pas ab us kī yaad se kaam hai

na vo ab shabāb ke valvale na ḳhayāl-e-shīsha-o-jām hai

maiñ tire hī naam pe huuñ fidā tirī yaad kā mujhe aasrā

tire sang-e-dar pe mirī qazā mirī zindagī kā payām hai

kabhī aah kī kabhī ġhash hue kabhī dil ko thaam ke ro diye

tire hijr meñ hameñ roz-o-shab yahī mashġhala yahī kaam hai

jo nikal paḌe mire ashk-e-ġham sar-e-bazm aap ḳhafā na hoñ

jo ubal ke mil ga.ī ḳhaak meñ vo sharāb fāzil-e-jām hai

ye na pūchho kitnī hai dāstāñ nahīñ sunñā chāhte so raho

kahūñ kaise apnī zabāñ se maiñ ki fasāna merā tamām hai

jo guzar gayā koī rāh-rau mirī qabr par to ye kah uThā

ye kisī javān kī qabr hai ki udaas jo sar-e-shām hai

huiiñ chaar āñkheñ bhī gar kabhī to nigāh sharm se pher lī

ye ajab tarah kī hai dostī na salām hai na kalām hai

vo jo ik hai 'ālī'-e-ḳhasta-tan vo asīr-e-zulf-e-habīb hai

jahāñ dekhiye yahī tazkira yahī zikr sā sar-e-ām he

nahin mujh ko hasrat ma-siwa pas ab us ki yaad se kaam hai

na wo ab shabab ke walwale na KHayal-e-shisha-o-jam hai

main tere hi nam pe hun fida teri yaad ka mujhe aasra

tere sang-e-dar pe meri qaza meri zindagi ka payam hai

kabhi aah ki kabhi ghash hue kabhi dil ko tham ke ro diye

tere hijr mein hamein roz-o-shab yahi mashghala yahi kaam hai

jo nikal paDe mere ashk-e-gham sar-e-bazm aap KHafa na hon

jo ubal ke mil gai KHak mein wo sharab fazil-e-jam hai

ye na puchho kitni hai dastan nahin sunna chahte so raho

kahun kaise apni zaban se main ki fasana mera tamam hai

jo guzar gaya koi rah-rau meri qabr par to ye kah uTha

ye kisi jawan ki qabr hai ki udas jo sar-e-sham hai

huin chaar aankhen bhi gar kabhi to nigah sharm se pher li

ye ajab tarah ki hai dosti na salam hai na kalam hai

wo jo ek hai 'ali'-e-KHasta-tan wo asir-e-zulf-e-habib hai

jahan dekhiye yahi tazkira yahi zikr sa sar-e-am he