naqsh wo aankh mein utra tha ki jata hi na tha

naqsh vo aañkh meñ utrā thā ki jaatā hī na thā

maiñ ne is dhuup ko Dhalte kahīñ dekhā hī na thā

ruuh kī pyaas bujhā.e na bujhegī kisī Dhañg

mujh ko is dasht kī pahnā.ī meñ ugnā hī na thā

pahle is ghar kī har ik khiḌkī khulī rahtī thī

yuuñ milā karte the jaise koī pardā hī na thā

ab jo insān havāoñ meñ uḌā phirtā hai

ye kabhī peḌ ke saa.e se nikaltā hī na thā

dauḌ paḌtā thā jahāñ ret se jalte the qadam

saath dariyā thā magar Dar se utartā hī na thā

aisī sardī meñ vahāñ jā ke kahāñ sustā.e

paar naddī ke koī dhuup kā ḳhema hī na thā

raat kā peḌ ugā thā ki koī saaya thā

kyā kahūñ haath lagā kar use dekhā hī na thā

kitne āzād the barsāt ke ḳhud-rav naale

apnī duniyā thī koī pūchhne vaalā hī na thā

hādisa aisā bhī pesh aa.egā mar jā.ūñgā

ḳhvāb aisā to kabhī umr meñ dekhā hī na thā

shā.irī ne mujhe insān banāyā hai 'ḳhalīl'

maiñ vo shīsha thā ki duniyā se chamaktā hī na thā

naqsh wo aankh mein utra tha ki jata hi na tha

main ne is dhup ko Dhalte kahin dekha hi na tha

ruh ki pyas bujhae na bujhegi kisi Dhang

mujh ko is dasht ki pahnai mein ugna hi na tha

pahle is ghar ki har ek khiDki khuli rahti thi

yun mila karte the jaise koi parda hi na tha

ab jo insan hawaon mein uDa phirta hai

ye kabhi peD ke sae se nikalta hi na tha

dauD paDta tha jahan ret se jalte the qadam

sath dariya tha magar Dar se utarta hi na tha

aisi sardi mein wahan ja ke kahan sustae

par naddi ke koi dhup ka KHema hi na tha

raat ka peD uga tha ki koi saya tha

kya kahun hath laga kar use dekha hi na tha

kitne aazad the barsat ke KHud-raw nale

apni duniya thi koi puchhne wala hi na tha

hadisa aisa bhi pesh aaega mar jaunga

KHwab aisa to kabhi umr mein dekha hi na tha

shairi ne mujhe insan banaya hai 'KHalil'

main wo shisha tha ki duniya se chamakta hi na tha