nazar fareb-e-qaza kha gai to kya hoga

nazar fareb-e-qazā khā ga.ī to kyā hogā

hayāt maut se Takrā ga.ī to kyā hogā

ba-zom-e-hosh tajallī kī justujū be-sūd

junūñ kī zad pe ḳhirad aa ga.ī to kyā hogā

na.ī sahar ke bahut log muntazir haiñ magar

na.ī sahar bhī jo kajlā ga.ī to kyā hogā

na rahnumāoñ kī majlis meñ le chalo mujh ko

maiñ be-adab huuñ hañsī aa ga.ī to kyā hogā

shabāb-e-lāl-o-gul ko pukārne vaalo

ḳhizāñ-sarisht bahār aa ga.ī to kyā hogā

ḳhushī chhanī hai to ġham kā bhī e'timād na kar

jo ruuh ġham se bhī uktā ga.ī to kyā hogā

ye fikr kar ki in āsūdgī ke dhokoñ meñ

tirī ḳhudī ko bhī maut aa ga.ī to kyā hogā

laraz rahe haiñ jigar jis se kohsāroñ ke

agar vo lahr yahāñ aa ga.ī to kyā hogā

vo maut jis kī ham 'ehsān' sun rahe haiñ ḳhabar

rumūz-e-zīst bhī samjhā ga.ī to kyā hogā

nazar fareb-e-qaza kha gai to kya hoga

hayat maut se Takra gai to kya hoga

ba-zom-e-hosh tajalli ki justuju be-sud

junun ki zad pe KHirad aa gai to kya hoga

nai sahar ke bahut log muntazir hain magar

nai sahar bhi jo kajla gai to kya hoga

na rahnumaon ki majlis mein le chalo mujh ko

main be-adab hun hansi aa gai to kya hoga

shabab-e-lal-o-gul ko pukarne walo

KHizan-sarisht bahaar aa gai to kya hoga

KHushi chhani hai to gham ka bhi e'timad na kar

jo ruh gham se bhi ukta gai to kya hoga

ye fikr kar ki in aasudgi ke dhokon mein

teri KHudi ko bhi maut aa gai to kya hoga

laraz rahe hain jigar jis se kohsaron ke

agar wo lahr yahan aa gai to kya hoga

wo maut jis ki hum 'ehsan' sun rahe hain KHabar

rumuz-e-zist bhi samjha gai to kya hoga