nazar hairat-zada si hai qadam bahke hue se hain

nazar hairat-zada sī hai qadam bahke hue se haiñ

shabāb aayā hai un par aur ham bahke hue se haiñ

abhī un ke karam kī baat apne husn-e-zan tak hai

magar ummīd-vārān-e-karam bahke hue se haiñ

vafā ke silsile meñ ho hī jaatī hai ġhalat-fahmī

vo bahkā.e ga.e se haiñ na ham bahke hue se haiñ

baḌe zī-hosh bante the mai-e-ishrat ke matvāle

huā hai jab se kuchh ehsās-e-ġham bahke hue se haiñ

unheñ ā.īna-ruḳh kahiye unhīñ ke sāmne jā kar

ye andāza to hotā hai ki ham bahke hue se haiñ

kahā karte the ham aksar ki rāh-e-zindagī hai kyā

jo ab dekhe haiñ us ke pech-o-ḳham bahke hue se haiñ

mirī duniyā hai ye ahl-e-junūñ kyā hosh vaale kyā

mirī duniyā meñ sab hī besh-o-kam bahke hue se haiñ

ḳhudā rakkhe chale haiñ manzil-e-jānāñ ko sar karne

vo dekho nā yahīñ jin ke qadam bahke hue se haiñ

har ik ne mujh ko dīvāna hī Thahrāyā hai ai 'mahshar'

sabhī qissa-nigāroñ ke qalam bahke hue se haiñ

nazar hairat-zada si hai qadam bahke hue se hain

shabab aaya hai un par aur hum bahke hue se hain

abhi un ke karam ki baat apne husn-e-zan tak hai

magar ummid-waran-e-karam bahke hue se hain

wafa ke silsile mein ho hi jati hai ghalat-fahmi

wo bahkae gae se hain na hum bahke hue se hain

baDe zi-hosh bante the mai-e-ishrat ke matwale

hua hai jab se kuchh ehsas-e-gham bahke hue se hain

unhen aaina-ruKH kahiye unhin ke samne ja kar

ye andaza to hota hai ki hum bahke hue se hain

kaha karte the hum aksar ki rah-e-zindagi hai kya

jo ab dekhe hain us ke pech-o-KHam bahke hue se hain

meri duniya hai ye ahl-e-junun kya hosh wale kya

meri duniya mein sab hi besh-o-kam bahke hue se hain

KHuda rakkhe chale hain manzil-e-jaanan ko sar karne

wo dekho na yahin jin ke qadam bahke hue se hain

har ek ne mujh ko diwana hi Thahraya hai ai 'mahshar'

sabhi qissa-nigaron ke qalam bahke hue se hain