نظر کا یہ اعجاز ہم دیکھتے ہیں

نظر کا یہ اعجاز ہم دیکھتے ہیں

ہر اک سمت وہ ہی صنم دیکھتے ہیں

ادھر آتے ان کے قدم دیکھتے ہیں

ستم ہے کہ ہے یہ کرم دیکھتے ہیں

جدا دیکھتے ہیں زمیں آسماں سے

خدا کا جدا یہ کرم دیکھتے ہیں

نہ دنیا رہے گی نہ ہم تم ہی ہوں گے

عبث ایک دوجے کو ہم دیکھتے ہیں

عداوت کی بنیاد ہی رشک پر ہے

عدو خواب میں خود کو ہم دیکھتے ہیں

بہت ملنے سے عیب دکھتے ہیں کم کم

بہت دیکھتے ہیں جو کم دیکھتے ہیں

کسی نے نہ دیکھا جو ظاہر تھا سب پر

جہاں میں سب اپنے بھرم دیکھتے ہیں

برا لگ گیا ہے مرا سچ ہی اتنا

ترے جھوٹ کو لوگ کم دیکھتے ہیں

نہیں ٹس سے مس ہوتے دیکھو گے ہم کو

رقیبو تمہارا بھی دم دیکھتے ہیں