nazar ko waqf-e-hairat kar diya hai

nazar ko vaqf-e-hairat kar diyā hai

use bhī dil se ruḳhsat kar diyā hai

barā.e-nām thā ārām jis ko

ġhazal kah kar musībat kar diyā hai

samajhte haiñ kahāñ patthar kisī kī

magar itmām-e-hujjat kar diyā hai

galī-kūchoñ meñ jaltī raushnī ne

hasīñ shāmoñ ko shāmat kar diyā hai

basīrat ek daulat hī thī āḳhir

so daulat ko basīrat kar diyā hai

ka.ī hamdam nikal aa.e haiñ jab se

zabāñ ko sirf ġhībat kar diyā hai

suḳhan ke baab meñ bhī ham ne 'aslam'

jo karnā thā ba-ujlat kar diyā hai

nazar ko waqf-e-hairat kar diya hai

use bhi dil se ruKHsat kar diya hai

barae-nam tha aaram jis ko

ghazal kah kar musibat kar diya hai

samajhte hain kahan patthar kisi ki

magar itmam-e-hujjat kar diya hai

gali-kuchon mein jalti raushni ne

hasin shamon ko shamat kar diya hai

basirat ek daulat hi thi aaKHir

so daulat ko basirat kar diya hai

kai hamdam nikal aae hain jab se

zaban ko sirf ghibat kar diya hai

suKHan ke bab mein bhi hum ne 'aslam'

jo karna tha ba-ujlat kar diya hai