nazar mein sulh bhi sar par lahu bhi dekhta hai

nazar meñ sulh bhī sar par lahū bhī dekhtā hai

mujhe to rashk se merā adū bhī dekhtā hai

maiñ shorishoñ meñ bhī dil ko qarīb rakhtā huuñ

yahī to hai jo pas-e-hāv-hū bhī dekhtā hai

charāġh unhīñ kī visātat se jal rahā hai magar

kabhī havāoñ ko ye tund-ḳhū bhī dekhtā hai

mujhe ye motī samundar yuuñ hī nahīñ detā

vo mere hausle bhī justujū bhī dekhtā hai

ye dil asiir tire naqsh-e-pā kā hai lekin

jo chuuk jaa.e to phir chār-sū bhī dekhtā hai

mire junūn ko donoñ aziiz haiñ jānāñ

ye dasht-o-dar hī nahīñ aabjū bhī dekhtā hai

hazār barg-o-samar jam.a ho ga.e 'arshad'

magar ye dil ki ma.āl-e-numū bhī dekhtā hai

nazar mein sulh bhi sar par lahu bhi dekhta hai

mujhe to rashk se mera adu bhi dekhta hai

main shorishon mein bhi dil ko qarib rakhta hun

yahi to hai jo pas-e-haw-hu bhi dekhta hai

charagh unhin ki wisatat se jal raha hai magar

kabhi hawaon ko ye tund-KHu bhi dekhta hai

mujhe ye moti samundar yun hi nahin deta

wo mere hausle bhi justuju bhi dekhta hai

ye dil asir tere naqsh-e-pa ka hai lekin

jo chuk jae to phir chaar-su bhi dekhta hai

mere junun ko donon aziz hain jaanan

ye dasht-o-dar hi nahin aabju bhi dekhta hai

hazar barg-o-samar jama ho gae 'arshad'

magar ye dil ki maal-e-numu bhi dekhta hai