nazron mein kahan uski wo pahla sa raha main

nazroñ meñ kahāñ us kī vo pahlā sā rahā maiñ

hañstā huuñ ki kyā soch ke kartā thā vafā maiñ

tū kaun hai ai zehn kī dastak ye batā de

har baar kī āvāz pe detā huuñ sadā maiñ

yaad aatā hai bachpan meñ bhī ustād ne mere

jis raah se rokā thā vahī raah chalā maiñ

jī ḳhush huā dekhe se ki āzād fazā hai

bastī se guzartā huā sahrā meñ rukā maiñ

muddat huī dekhe hue vo shahr-e-nigārāñ

ai dil kahīñ bhūlā to nahīñ terī adā maiñ

manzil kī talab meñ na thā āsān guzarnā

patthar the bahut raah meñ gir gir ke uThā maiñ

kyā din haiñ ki ab maut kī ḳhvāhish hai barābar

kyā din the ki jab jiine kī kartā thā duā maiñ

sach kahiyo ki vāqif ho mire haal se 'āmir'

duniyā hai ḳhafā mujh se ki duniyā se ḳhafā maiñ

nazron mein kahan us ki wo pahla sa raha main

hansta hun ki kya soch ke karta tha wafa main

tu kaun hai ai zehn ki dastak ye bata de

har bar ki aawaz pe deta hun sada main

yaad aata hai bachpan mein bhi ustad ne mere

jis rah se roka tha wahi rah chala main

ji KHush hua dekhe se ki aazad faza hai

basti se guzarta hua sahra mein ruka main

muddat hui dekhe hue wo shahr-e-nigaran

ai dil kahin bhula to nahin teri ada main

manzil ki talab mein na tha aasan guzarna

patthar the bahut rah mein gir gir ke uTha main

kya din hain ki ab maut ki KHwahish hai barabar

kya din the ki jab jine ki karta tha dua main

sach kahiyo ki waqif ho mere haal se 'amir'

duniya hai KHafa mujh se ki duniya se KHafa main