nigah-e-barq thi ab tak to mere hi nasheman par

nigāh-e-barq thī ab tak to mere hī nasheman par

magar ab kuchh taḌap sī dekhtā huuñ saare gulshan par

kahūñ kis tarh ḳhūn-e-be-gunah aur un kī gardan par

nazar aate haiñ lekin kuchh lahū ke daaġh dāman par

kisī bedard ko dard-āshnā karnā bhī kyā jāneñ

vo aañsū jo bahut umDe to gir paḌte haiñ dāman par

kahāñ ab pairahan kī ḳhair gulshan bhī bayābāñ hai

yahāñ bhī kāñTe kāñTe kī nazar hai jeb-o-dāman par

use ye kyā ḳhabar thī tābish-e-ḳhurshīd kyā hogī

jo shabnam sub.h tak sotī rahī phūloñ ke dāman par

vahī ab chāra-sāz-e-dard-e-insāñ ban ke baiThe haiñ

vo jin kī zindagī ḳhud daaġh hai insāñ ke dāman par

sitam hai yā karam is be-par-o-bālī pe kyā kahiye

qafas laTkā diyā sayyād ne shāḳh-e-nasheman par

jab un kī har adā par ḳhud hamārā dam nikaltā ho

to phir kis muñh se kahiye ḳhuun apnā un kī gardan par

udhar ho āshiyāñ-sāzī idhar ho āshiyāñ-sāzī

kahāñ tak bijliyāñ girtī hī jā.eñgī nasheman par

vahāñ jab hasb-e-iste'dād hai in'ām kī bārish

nahīñ phir kyoñ nigāh-e-lutf ho jaatī hai dushman par

ilāhī ḳhatm shab par bhī saverā ho nahīñ saktā

dhuñdalkā sā abhī chhāyā hai rū-e-subh-e-gulshan par

ḳhulūs-e-haq-parastī hai na josh-e-but-parastī hai

paḌī hai os kaisī jazba-e-shaiḳh-o-barahman par

jo khetī ruuh kī murjhā.e jumbish tak nahīñ hotī

laraz jaate haiñ jab bijlī taḌap jaatī hai ḳhirman par

ye 'ārif' kam-nigāhī ham par ik muddat se taarī hai

nigāh-e-intiḳhāb-e-rāhbar paḌtī hai rahzan par

nigah-e-barq thi ab tak to mere hi nasheman par

magar ab kuchh taDap si dekhta hun sare gulshan par

kahun kis tarh KHun-e-be-gunah aur un ki gardan par

nazar aate hain lekin kuchh lahu ke dagh daman par

kisi bedard ko dard-ashna karna bhi kya jaanen

wo aansu jo bahut umDe to gir paDte hain daman par

kahan ab pairahan ki KHair gulshan bhi bayaban hai

yahan bhi kanTe kanTe ki nazar hai jeb-o-daman par

use ye kya KHabar thi tabish-e-KHurshid kya hogi

jo shabnam subh tak soti rahi phulon ke daman par

wahi ab chaara-saz-e-dard-e-insan ban ke baiThe hain

wo jin ki zindagi KHud dagh hai insan ke daman par

sitam hai ya karam is be-par-o-baali pe kya kahiye

qafas laTka diya sayyaad ne shaKH-e-nasheman par

jab un ki har ada par KHud hamara dam nikalta ho

to phir kis munh se kahiye KHun apna un ki gardan par

udhar ho aashiyan-sazi idhar ho aashiyan-sazi

kahan tak bijliyan girti hi jaengi nasheman par

wahan jab hasb-e-iste'dad hai in'am ki barish

nahin phir kyon nigah-e-lutf ho jati hai dushman par

ilahi KHatm shab par bhi sawera ho nahin sakta

dhundalka sa abhi chhaya hai ru-e-subh-e-gulshan par

KHulus-e-haq-parasti hai na josh-e-but-parasti hai

paDi hai os kaisi jazba-e-shaiKH-o-barahman par

jo kheti ruh ki murjhae jumbish tak nahin hoti

laraz jate hain jab bijli taDap jati hai KHirman par

ye 'arif' kam-nigahi hum par ek muddat se tari hai

nigah-e-intiKHab-e-rahbar paDti hai rahzan par