nigah-e-yar humse aaj be-taqsir phirti hai

nigāh-e-yār ham se aaj be-taqsīr phirtī hai

kisī kī kuchh nahīñ chaltī hai jab taqdīr phirtī hai

muraqqa.a hai mirī āñkhoñ meñ kyā yārān-e-rafta kā

jo nazroñ ke tale har ek kī tasvīr phirtī hai

tirā dīvāna jab se uTh gayā sahrā-e-vahshat se

bagūle kī tarah se DhūñDhtī zanjīr phirtī hai

tirī talvār kā muñh ham se phir jaa.e to phir jaa.e

hamārī aañkh kab qātil tah-e-shamshīr phirtī hai

kabhī to khīñch lā.egī use gor-e-ġharībāñ par

ki muddat se hamārī ḳhaak dāman-gīr phirtī hai

bayāñ kis muñh se ho.e yaar kī shīrīñ-kalāmī kā

zabāñ par apnī ab tak lazzat-e-taqrīr phirtī hai

maqām-e-ishq meñ shāh-o-gadā kā ek rutba hai

zuleḳhā har galī-kūche meñ be-tauqīr phirtī hai

firāqe-e-gul meñ itnā tū abas nālāñ o muztar hai

bahār-e-rafta phir ai bulbul-e-dil-gīr phirtī hai

dar-e-bāb-e-asar tak ek din jaate nahīñ dekhā

ḳhudā jaane kahāñ ye āh-e-be-tāsīr phirtī hai

ḳhudā shāhid hai is kā phir nahīñ miltī nahīñ miltī

tabī.at apnī jis se o but-e-be-pīr phirtī hai

ham us lailā ko dīvāne haiñ ai 'ġhāfil' jo sahrā meñ

baġhal meñ apne majnūñ kī liye tasvīr phirtī hai

nigah-e-yar hum se aaj be-taqsir phirti hai

kisi ki kuchh nahin chalti hai jab taqdir phirti hai

muraqqa hai meri aankhon mein kya yaran-e-rafta ka

jo nazron ke tale har ek ki taswir phirti hai

tera diwana jab se uTh gaya sahra-e-wahshat se

bagule ki tarah se DhunDhti zanjir phirti hai

teri talwar ka munh hum se phir jae to phir jae

hamari aankh kab qatil tah-e-shamshir phirti hai

kabhi to khinch laegi use gor-e-ghariban par

ki muddat se hamari KHak daman-gir phirti hai

bayan kis munh se hoe yar ki shirin-kalami ka

zaban par apni ab tak lazzat-e-taqrir phirti hai

maqam-e-ishq mein shah-o-gada ka ek rutba hai

zuleKHa har gali-kuche mein be-tauqir phirti hai

firaqe-e-gul mein itna tu abas nalan o muztar hai

bahaar-e-rafta phir ai bulbul-e-dil-gir phirti hai

dar-e-bab-e-asar tak ek din jate nahin dekha

KHuda jaane kahan ye aah-e-be-tasir phirti hai

KHuda shahid hai is ka phir nahin milti nahin milti

tabiat apni jis se o but-e-be-pir phirti hai

hum us laila ko diwane hain ai 'ghafil' jo sahra mein

baghal mein apne majnun ki liye taswir phirti hai