nigal gae sab ki sab samundar zamin bachi ab kahin nahin hai

nigal ga.e sab kī sab samundar zamīñ bachī ab kahīñ nahīñ hai

bachāte ham apnī jaan jis meñ vo kashtī bhī ab kahīñ nahīñ hai

bahut dinoñ ba.ad paa.ī fursat to maiñ ne ḳhud ko palaT ke dekhā

magar maiñ pahchāntā thā jis ko vo aadmī ab kahīñ nahīñ hai

guzar gayā vaqt dil pe likh kar na jaane kaisī ajiib bāteñ

varaq palaTtā huuñ maiñ jo dil ke to sādgī ab kahīñ nahīñ hai

vo aag barsī hai dopahar meñ ki saare manzar jhulas ga.e haiñ

yahāñ savere jo tāzgī thī vo tāzgī ab kahīñ nahīñ hai

tum apne qasboñ meñ jā ke dekho vahāñ bhī ab shahr hī base haiñ

ki DhūñDhte ho jo zindagī tum vo zindagī ab kahīñ nahīñ hai

nigal gae sab ki sab samundar zamin bachi ab kahin nahin hai

bachate hum apni jaan jis mein wo kashti bhi ab kahin nahin hai

bahut dinon baad pai fursat to main ne KHud ko palaT ke dekha

magar main pahchanta tha jis ko wo aadmi ab kahin nahin hai

guzar gaya waqt dil pe likh kar na jaane kaisi ajib baaten

waraq palaTta hun main jo dil ke to sadgi ab kahin nahin hai

wo aag barsi hai dopahar mein ki sare manzar jhulas gae hain

yahan sawere jo tazgi thi wo tazgi ab kahin nahin hai

tum apne qasbon mein ja ke dekho wahan bhi ab shahr hi base hain

ki DhunDhte ho jo zindagi tum wo zindagi ab kahin nahin hai