nindon ka ek aalam-e-asbab aur hai

nīndoñ kā ek ālam-e-asbāb aur hai

shāyad kisī kī aañkh meñ ik ḳhvāb aur hai

tū mujh ko tāq-e-sīna meñ rakkhā huā na jaan

maiñ jis meñ jal rahā huuñ vo mehrāb aur hai

yūñhī nahīñ ye zarbat-e-tesha kī dastakeñ

lagtā hai ik fasīl pas-e-bāb aur hai

lahrā rahā hai sat.h pe mahtāb-e-ġhota-zan

har-chand ek shahr tah-e-āb aur hai

phūTī haiñ jis jagah mirī āñkhoñ kī koñpleñ

dil se pare vo ḳhitta-e-shādāb aur hai

khoyā huā huuñ niiñd ke parde ke us taraf

lagtā hai ek ḳhvāb pas-e-ḳhvāb aur hai

kirneñ to ik nigāh-e-subuk-rau kī lahr haiñ

dumbāla-dāri-e-shab-e-mahtāb aur hai

'tābish' ye terā aks nahīñ merī aañkh meñ

is jhiil meñ ye partav-e-zartāb aur hai

nindon ka ek aalam-e-asbab aur hai

shayad kisi ki aankh mein ek KHwab aur hai

tu mujh ko taq-e-sina mein rakkha hua na jaan

main jis mein jal raha hun wo mehrab aur hai

yunhi nahin ye zarbat-e-tesha ki dastaken

lagta hai ek fasil pas-e-bab aur hai

lahra raha hai sath pe mahtab-e-ghota-zan

har-chand ek shahr tah-e-ab aur hai

phuTi hain jis jagah meri aankhon ki konplen

dil se pare wo KHitta-e-shadab aur hai

khoya hua hun nind ke parde ke us taraf

lagta hai ek KHwab pas-e-KHwab aur hai

kirnen to ek nigah-e-subuk-rau ki lahr hain

dumbaala-dari-e-shab-e-mahtab aur hai

'tabish' ye tera aks nahin meri aankh mein

is jhil mein ye partaw-e-zartab aur hai