nikal gaya hai koi mar-dhaD karte hue

nikal gayā hai koī mār-dhāḌ karte hue

bharī-purī mirī āñkheñ ujaaḌ karte hue

ye rat-jage sar-e-vahshat ghasīTte haiñ mujhe

maiñ lauTtī huuñ kitāboñ ko aaḌ karte hue

ajiib tarz-e-hunar par aḌe haiñ log yahāñ

banāo siikh rahe haiñ bigāḌ karte hue

na-jāne kaun sī raa.ī adū ke haath lagī

ki nīm-jān hai us ko pahāḌ karte hue

chaTān jaisā ta.alluq bhī TuuT jaatā hai

zarā sī darz ko gahrī darāḌ karte hue

hameñ ye kaisā darinda sifāt daur milā

guzar rahā hai bahut chīr-phāḌ karte hue

yahāñ-vahāñ ke fareboñ se Tokarī bhar lī

idhar udhar se ḳhushī kā jugāḌ karte hue

adal-badal meñ hī ḳheme tabāh kar Daale

yahāñ na gaaḌ vahāñ se ukhāḌ karte hue

bhaḌak rahe ho musalsal sar-e-sukūt-o-suḳhan

kisī hasad meñ ḳhayāloñ ko bhaaḌ karte hue

nikal gaya hai koi mar-dhaD karte hue

bhari-puri meri aankhen ujaD karte hue

ye rat-jage sar-e-wahshat ghasiTte hain mujhe

main lauTti hun kitabon ko aaD karte hue

ajib tarz-e-hunar par aDe hain log yahan

banao sikh rahe hain bigaD karte hue

na-jaane kaun si rai adu ke hath lagi

ki nim-jaan hai us ko pahaD karte hue

chaTan jaisa talluq bhi TuT jata hai

zara si darz ko gahri daraD karte hue

hamein ye kaisa darinda sifat daur mila

guzar raha hai bahut chir-phaD karte hue

yahan-wahan ke farebon se Tokari bhar li

idhar udhar se KHushi ka jugaD karte hue

adal-badal mein hi KHeme tabah kar Dale

yahan na gaD wahan se ukhaD karte hue

bhaDak rahe ho musalsal sar-e-sukut-o-suKHan

kisi hasad mein KHayalon ko bhaD karte hue