nikla jo chilmanon se wo chehra aaftabi

niklā jo chilmanoñ se vo chehra āftābī

ik aan meñ ufuq kā āñchal huā gulābī

ruḳh se naqāb un ke sarkā huā hai kuchh kuchh

dīvāna kar na Daale ye nīm-be-hijābī

sau jaam kā nasha hai saaqī tirī nazar meñ

kahte haiñ bāda-kash bhī mujh ko tirā sharābī

bekār lag rahī haiñ duniyā kī sab kitābeñ

dekhī hai jab se maiñ ne sūrat tirī kitābī

murjhā.e phuul sab haiñ kaliyoñ ne sar jhukā.e

gulshan meñ ik sitam hai ye terī be-naqābī

kab chain se rahā hai ye fikr kā parinda

'fayyāz' kī hai fitrat kis darja iztirābī

nikla jo chilmanon se wo chehra aaftabi

ek aan mein ufuq ka aanchal hua gulabi

ruKH se naqab un ke sarka hua hai kuchh kuchh

diwana kar na Dale ye nim-be-hijabi

sau jam ka nasha hai saqi teri nazar mein

kahte hain baada-kash bhi mujh ko tera sharabi

bekar lag rahi hain duniya ki sab kitaben

dekhi hai jab se main ne surat teri kitabi

murjhae phul sab hain kaliyon ne sar jhukae

gulshan mein ek sitam hai ye teri be-naqabi

kab chain se raha hai ye fikr ka parinda

'fayyaz' ki hai fitrat kis darja iztirabi