niyaz-agin hai aur naz-afrin bhi

niyāz-āgīñ hai aur nāz-āfrīñ bhī

agar sajde meñ jhuk jaa.e jabīñ bhī

haq-āgāhī se uTh jā.eñge parde

nazar ho nukta-ras bhī nukta-chīñ bhī

diloñ meñ chāhiye vus.at-nigāhī

badal jaatī hai chashm-e-ḳhashmagīñ bhī

haqā.eq par jamī hai gard-e-bātil

hai gum vahmoñ meñ ehsās-e-yaqīñ bhī

salāmat un kā dāman be-ḳhudī meñ

liyā hai ham ne kār-e-āstīñ bhī

ujāle haiñ mire qalb-o-nazar ke

ye mehr-e-zau-fishāñ māh-e-mubīñ bhī

ba-faiz-e-talḳhī-e-hālāt 'raunaq'

ibārat zahr se hai añgbīñ bhī

niyaz-agin hai aur naz-afrin bhi

agar sajde mein jhuk jae jabin bhi

haq-agahi se uTh jaenge parde

nazar ho nukta-ras bhi nukta-chin bhi

dilon mein chahiye wusat-nigahi

badal jati hai chashm-e-KHashmagin bhi

haqaeq par jami hai gard-e-baatil

hai gum wahmon mein ehsas-e-yaqin bhi

salamat un ka daman be-KHudi mein

liya hai hum ne kar-e-astin bhi

ujale hain mere qalb-o-nazar ke

ye mehr-e-zau-fishan mah-e-mubin bhi

ba-faiz-e-talKHi-e-haalat 'raunaq'

ibarat zahr se hai angbin bhi