niyaz-o-naz ka ye silsila nahin jata

niyāz-o-nāz kā ye silsila nahīñ jaatā

jafā ko chheḌ ke shauq-e-vafā nahīñ jaatā

khaTak rahī haiñ jo rag rag meñ pairtī phāñseñ

kisī se ek Thikāne rahā nahīñ jaatā

jo aap vaj.h na pūchheñ to ek baat kahūñ

baġhair aap ke mujh se jiyā nahīñ jaatā

ḳhatā muaaf bahut de diyā tumhārā saath

ab apne haal pe mujh se hañsā nahīñ jaatā

ye aur baat hai jab bhī uThā diye jaa.eñ

tumhārī bazm se lekin uThā nahīñ jaatā

ajiib tiir kaleje pe khaa.e baiThā huuñ

ajiib zaḳhm ki jis kā mazā nahīñ jaatā

jahāñ banāte hoñ qismat miTā ke ḳhuddārī

zamāna jaa.e to jaa.e 'razā' nahīñ jaatā

niyaz-o-naz ka ye silsila nahin jata

jafa ko chheD ke shauq-e-wafa nahin jata

khaTak rahi hain jo rag rag mein pairti phansen

kisi se ek Thikane raha nahin jata

jo aap wajh na puchhen to ek baat kahun

baghair aap ke mujh se jiya nahin jata

KHata muaf bahut de diya tumhaara sath

ab apne haal pe mujh se hansa nahin jata

ye aur baat hai jab bhi uTha diye jaen

tumhaari bazm se lekin uTha nahin jata

ajib tir kaleje pe khae baiTha hun

ajib zaKHm ki jis ka maza nahin jata

jahan banate hon qismat miTa ke KHuddari

zamana jae to jae 'raza' nahin jata