numayan jab wo apne zehn ki taswir karta hai

numāyāñ jab vo apne zehn kī tasvīr kartā hai

har ik ahl-e-mohabbat ko bahut dil-gīr kartā hai

vo kyuuñ masrūr hotā hai hamārā ḳhuun bahne se

sar-e-haq kis liye zālim tah-e-shamshīr kartā hai

vafā kā naam letā hai vafā-nā-āshnā ho kar

vo ḳhud ko intihā.ī pārsā ta.abīr kartā hai

jise mahrūm honā hai vahī hai mutma.in yaaro

jo hai nusrat kā tālib har qadam tadbīr kartā hai

har ik insān ke a.amāl bhī yaksāñ nahīñ hote

koī ghar toḌ detā hai koī ta.amīr kartā hai

sadāqat par kabhī un kā asar hone nahīñ paatā

vo apne kārnāmoñ kī bahut tash.hīr kartā hai

koī bhī mas.ala 'abrār' hal hone nahīñ paatā

masā.il vo hamāre sūrat-e-kashmīr kartā hai

numayan jab wo apne zehn ki taswir karta hai

har ek ahl-e-mohabbat ko bahut dil-gir karta hai

wo kyun masrur hota hai hamara KHun bahne se

sar-e-haq kis liye zalim tah-e-shamshir karta hai

wafa ka nam leta hai wafa-na-ashna ho kar

wo KHud ko intihai parsa tabir karta hai

jise mahrum hona hai wahi hai mutmain yaro

jo hai nusrat ka talib har qadam tadbir karta hai

har ek insan ke aamal bhi yaksan nahin hote

koi ghar toD deta hai koi tamir karta hai

sadaqat par kabhi un ka asar hone nahin pata

wo apne karnamon ki bahut tashhir karta hai

koi bhi masala 'abrar' hal hone nahin pata

masail wo hamare surat-e-kashmir karta hai