pa-ba-zanjir thin haalat ki mari chiKHen

pā-ba-zanjīr thiiñ hālāt kī maarī chīḳheñ

aah ban kar hī nikal pā.īñ hamārī chīḳheñ

chīḳhte chīḳhte kohrām machā rakkhā hai

phir bhī suntā hai yahāñ kaun tumhārī chīḳheñ

sunñe vaalā hī nahīñ thā koī tanhā.ī thī

siskiyāñ ban ga.iiñ āḳhir meñ hamārī chīḳheñ

pahle dekhā na sunā dard kā mātam aisā

vo samā'at pe saraktī huī aarī chīḳheñ

shor karnā to thā mamnū' tirī bastī meñ

to siyāhī se hī kāġhaz pe utārī chīḳheñ

gūñjtī hī rahīñ jangal kī fazā.eñ paiham

jab talak paḌ na ga.iiñ saañs pe bhārī chīḳheñ

ek din phuuT ke niklegā sadā kā dariyā

ham ne siine meñ chhupā rakkhī haiñ saarī chīḳheñ

pa-ba-zanjir thin haalat ki mari chiKHen

aah ban kar hi nikal pain hamari chiKHen

chiKHte chiKHte kohram macha rakkha hai

phir bhi sunta hai yahan kaun tumhaari chiKHen

sunne wala hi nahin tha koi tanhai thi

siskiyan ban gain aaKHir mein hamari chiKHen

pahle dekha na suna dard ka matam aisa

wo sama'at pe sarakti hui aari chiKHen

shor karna to tha mamnu' teri basti mein

to siyahi se hi kaghaz pe utari chiKHen

gunjti hi rahin jangal ki fazaen paiham

jab talak paD na gain sans pe bhaari chiKHen

ek din phuT ke niklega sada ka dariya

hum ne sine mein chhupa rakkhi hain sari chiKHen