panch din ko jo yahan par aa gaya

pāñch din ko jo yahāñ par aa gayā

misl-e-gul do roz meñ kumhlā gayā

zindagī phuslā ke le aa.ī mujhe

kaun zālim us jagah bahlā gayā

kyuuñ chhuTā kar ek adam ke aish ko

dūsrā koī adam dikhlā gayā

hasti-e-mauhūm par jo ġhaur kī

dosto be-tarah jī ghabrā gayā

peshtar marne se marnā ḳhuub hai

jo ki ye samjhāo vahī kuchh pā gayā

aah is dil ne na maanī ek baat

nāsehā sau tarah se samjhā gayā

''ahl-e-duniyā kāfirān-e-mutlaq-añd''

masnavī-e-rūm ye farmā gayā

zaq-zaq-o-baq-baq ko ab tū chhoḌ de

tiflagī barnā kā sab jhagḌā gayā

sheb aayā ab to 'afrīdī' samajh

kyā bharosa dam kā hai aayā gayā

kuchh khilā le khā le le jaanā nahīñ

jo gayā hai yaañ se so tanhā gayā

kaun hai vo faqīr-o-bādshāh

jo kaf-e-afsos nahiñ maltā gayā

hasrat-o-ranj-o-alam ġham ke sivā

koī yaañ se vaañ ke ta.iiñ le kyā gayā

'āfrīdī' yaañ sadā rahnā nahīñ

jo gayā hai vo yahī kahtā gayā

panch din ko jo yahan par aa gaya

misl-e-gul do roz mein kumhla gaya

zindagi phusla ke le aai mujhe

kaun zalim us jagah bahla gaya

kyun chhuTa kar ek adam ke aish ko

dusra koi adam dikhla gaya

hasti-e-mauhum par jo ghaur ki

dosto be-tarah ji ghabra gaya

peshtar marne se marna KHub hai

jo ki ye samjhao wahi kuchh pa gaya

aah is dil ne na mani ek baat

naseha sau tarah se samjha gaya

ahl-e-duniya kafiran-e-mutlaq-and

masnawi-e-rum ye farma gaya

zaq-zaq-o-baq-baq ko ab tu chhoD de

tiflagi barna ka sab jhagDa gaya

sheb aaya ab to 'afridi' samajh

kya bharosa dam ka hai aaya gaya

kuchh khila le kha le le jaana nahin

jo gaya hai yan se so tanha gaya

kaun hai wo faqir-o-baadshah

jo kaf-e-afsos nahin malta gaya

hasrat-o-ranj-o-alam gham ke siwa

koi yan se wan ke tain le kya gaya

'afridi' yan sada rahna nahin

jo gaya hai wo yahi kahta gaya