phir dil ne kaha pyar kiya jae kisi ko

phir dil ne kahā pyaar kiyā jaa.e kisī ko

jaise bhī ho hamvār kiyā jaa.e kisī ko

yuuñ yaad lagātār kiyā jaa.e kisī ko

āmāda-e-iz.hār kiyā jaa.e kisī ko

kam-hausla hai koī mohabbat meñ to phir kyuuñ

be-kār girāñ-bār kiyā jaa.e kisī ko

ma.ashūq kī marzī meñ hī āshiq kī razā hai

mash.hūr ḳhatā-vār kiyā jaa.e kisī ko

dil us kā jigar us kā hai jaañ us kī ham us ke

kis baat se inkār kiyā jaa.e kisī ko

saaqī kī ināyat hai to mai-kash ko hai kyā uzr

āsūda o sarshār kiyā jaa.e kisī ko

ik kaif thā sāġhar meñ to ham ban ga.e kaifī

sharminda na be-kār kiyā jaa.e kisī ko

hai be-kasī be-gunah to phir kyuuñ mere sarkār

rusvā sar-e-darbār kiyā jaa.e kisī ko

samjhāyā bahut ham ne pe 'rahbar' ko ye zid hai

sharminda-e-kirdār kiyā jaa.e kisī ko

phir dil ne kaha pyar kiya jae kisi ko

jaise bhi ho hamwar kiya jae kisi ko

yun yaad lagatar kiya jae kisi ko

aamada-e-izhaar kiya jae kisi ko

kam-hausla hai koi mohabbat mein to phir kyun

be-kar giran-bar kiya jae kisi ko

mashuq ki marzi mein hi aashiq ki raza hai

mashhur KHata-war kiya jae kisi ko

dil us ka jigar us ka hai jaan us ki hum us ke

kis baat se inkar kiya jae kisi ko

saqi ki inayat hai to mai-kash ko hai kya uzr

aasuda o sarshaar kiya jae kisi ko

ek kaif tha saghar mein to hum ban gae kaifi

sharminda na be-kar kiya jae kisi ko

hai be-kasi be-gunah to phir kyun mere sarkar

ruswa sar-e-darbar kiya jae kisi ko

samjhaya bahut hum ne pe 'rahbar' ko ye zid hai

sharminda-e-kirdar kiya jae kisi ko