phir hunar-mandon ke ghar se be-hunar jata hun main

phir hunar-mandoñ ke ghar se be-hunar jaatā huuñ maiñ

tum ḳhabar be-zār ho ahl-e-nazar jaatā huuñ maiñ

jeb meñ rakh lī haiñ kyuuñ tum ne zabāneñ kaaT kar

kis se ab ye ajnabī pūchhe kidhar jaatā huuñ maiñ

haañ maiñ saaya huuñ kisī shai kā magar ye bhī to dekh

gar ta.āqub meñ na ho sūraj to mar jaatā huuñ maiñ

haath āñkhoñ se uThā kar dekh mujh se kuchh na pūchh

kyuuñ ufuq par phailtī sub.hoñ se Dar jaatā huuñ maiñ

bas yūñhī tanhā rahūñgā is safar meñ umr bhar

jis taraf koī nahīñ jaatā udhar jaatā huuñ maiñ

ḳhauf kī ye intihā sadiyoñ se āñkheñ band haiñ

shauq kī ye ablahī be-bāl-o-par jaatā huuñ maiñ

'arsh' rasmoñ kī panah-gāheñ bhī ab sar par nahīñ

aur vahshī rāstoñ par be-sipar jaatā huuñ maiñ

phir hunar-mandon ke ghar se be-hunar jata hun main

tum KHabar be-zar ho ahl-e-nazar jata hun main

jeb mein rakh li hain kyun tum ne zabanen kaT kar

kis se ab ye ajnabi puchhe kidhar jata hun main

han main saya hun kisi shai ka magar ye bhi to dekh

gar taaqub mein na ho suraj to mar jata hun main

hath aankhon se uTha kar dekh mujh se kuchh na puchh

kyun ufuq par phailti subhon se Dar jata hun main

bas yunhi tanha rahunga is safar mein umr bhar

jis taraf koi nahin jata udhar jata hun main

KHauf ki ye intiha sadiyon se aankhen band hain

shauq ki ye ablahi be-baal-o-par jata hun main

'arsh' rasmon ki panah-gahen bhi ab sar par nahin

aur wahshi raston par be-sipar jata hun main