phir is se qabl ki bar-e-digar banaya jae

phir is se qabl ki bār-e-digar banāyā jaa.e

ye ā.īna hai ise dekh kar banāyā jaa.e

maiñ sochtā huuñ tire lā-makāñ ke us jānib

makān kaisā banegā agar banāyā jaa.e

zarā zarā se ka.ī naqs haiñ abhī mujh meñ

na.e sire se mujhe gūñdh kar banāyā jaa.e

zamīn itnī nahīñ hai ki paañv rakh paa.eñ

dil-e-ḳharāb kī zid hai ki ghar banāyā jaa.e

bahut se lafz paḌe hāshiyoñ meñ sochte haiñ

kisī tarah se ibārat meñ dar banāyā jaa.e

vo jā rahā hai to jaate hue ko roknā kyā

zarā sī baat ko kyuuñ dard-e-sar banāyā jaa.e

kahīñ rukeñge to tāriq-'na.īm' dekheñge

safar meñ kyā koī zād-e-safar banāyā jaa.e

phir is se qabl ki bar-e-digar banaya jae

ye aaina hai ise dekh kar banaya jae

main sochta hun tere la-makan ke us jaanib

makan kaisa banega agar banaya jae

zara zara se kai naqs hain abhi mujh mein

nae sire se mujhe gundh kar banaya jae

zamin itni nahin hai ki panw rakh paen

dil-e-KHarab ki zid hai ki ghar banaya jae

bahut se lafz paDe hashiyon mein sochte hain

kisi tarah se ibarat mein dar banaya jae

wo ja raha hai to jate hue ko rokna kya

zara si baat ko kyun dard-e-sar banaya jae

kahin rukenge to tariq-'naim' dekhenge

safar mein kya koi zad-e-safar banaya jae