phir taqaza hai ki tajdid-e-wafa ho jae

phir taqāzā hai ki tajdīd-e-vafā ho jaa.e

ḳhūn-e-dil nazr karo farz adā ho jaa.e

ham haiñ sarshār-e-mohabbat na shikāyat na gila

aap ko uzr hai to uzr-e-jafā ho jaa.e

tishna-lab koī na rah jaa.e tirī mahfil meñ

jashn hai aaj to rindoñ kā bhalā ho jaa.e

terā mai-ḳhāna salāmat rahe ābād rahe

sāqiyā ham ko bhī ik jaam atā ho jaa.e

sust-gāmī se nahīñ tab-e-ravāñ ko nisbat

jāda-e-shauq pe aa.e to havā ho jaa.e

yuuñ taḌap ai dil-e-betāb ki dhaḌkan se tirī

barq-raftār zamāne kī fazā ho jaa.e

zālimo soch lo anjām-e-sitam kyā hogā

aaj kā din hī agar roz-e-jazā ho jaa.e

ahl-e-dil kaif-e-mohabbat hai usī ke dam se

dard-e-dil aur sivā aur sivā ho jaa.e

mai-kasho aao chalo shaiḳh-o-barahman se mileñ

raat kā pichhlā pahar sarf-e-duā ho jaa.e

sub.h ho jaa.e to manzil kī taraf tez qadam

is qadar tez ki shal bāñg-e-darā ho jaa.e

raah meñ dair-o-haram aa.eñ to sajda kar lo

shāyad is tarah ġharīboñ kā ḳhudā ho jaa.e

phir taqaza hai ki tajdid-e-wafa ho jae

KHun-e-dil nazr karo farz ada ho jae

hum hain sarshaar-e-mohabbat na shikayat na gila

aap ko uzr hai to uzr-e-jafa ho jae

tishna-lab koi na rah jae teri mahfil mein

jashn hai aaj to rindon ka bhala ho jae

tera mai-KHana salamat rahe aabaad rahe

saqiya hum ko bhi ek jam ata ho jae

sust-gami se nahin tab-e-rawan ko nisbat

jada-e-shauq pe aae to hawa ho jae

yun taDap ai dil-e-betab ki dhaDkan se teri

barq-raftar zamane ki faza ho jae

zalimo soch lo anjam-e-sitam kya hoga

aaj ka din hi agar roz-e-jaza ho jae

ahl-e-dil kaif-e-mohabbat hai usi ke dam se

dard-e-dil aur siwa aur siwa ho jae

mai-kasho aao chalo shaiKH-o-barahman se milen

raat ka pichhla pahar sarf-e-dua ho jae

subh ho jae to manzil ki taraf tez qadam

is qadar tez ki shal bang-e-dara ho jae

rah mein dair-o-haram aaen to sajda kar lo

shayad is tarah gharibon ka KHuda ho jae