پچھلے برس کے سانحے بھولے نہ ہم ابھی

پچھلے برس کے سانحے بھولے نہ ہم ابھی

تم سامنے نہ آؤ کہ تازہ ہیں غم ابھی

منصف ہمارے عہد کے اللہ کی پناہ

قاتل سے کہہ رہے ہیں کہ ہے محترم ابھی

اٹھنے لگیں ابھی سے مری سمت انگلیاں

دہلیز میکدہ پہ رکھا ہے قدم ابھی

کوئی نہیں ہے میرا غم ہجر کے سوا

کیا جانے کس کی یاد میں پلکیں ہیں نم ابھی

کیجے جفائیں اور کہ پھولے پھلے یہ فن

سوز و گداز طرز بیاں میں ہے کم ابھی

اس کو جہاں میں اور بھی ہونا ہے پائیدار

اردو زباں پہ ڈھاتے ہی رہیے ستم ابھی

دل میں خدا ہے ان کے کہو ان سے سرفرازؔ

جو پھر رہے ہیں دیکھتے دیر و حرم ابھی