piyūñ hī kyuuñ jo burā jānūñ aur chhupā ke piyūñ
maiñ vo nahīñ ki nigāheñ bachā bachā ke piyūñ
miTā diye haiñ sab ehsās uf re zauq-e-sharāb
surūr kam na ho turshī bhī gar milā ke piyūñ
gunah pe tohmat-e-be-lazzatī na rakh zāhid
maza na aa.e to kyuuñ muñh banā banā ke piyūñ
ye tishnagī-e-shahādat kā iqtizā ab hai
ki āb-e-teġh-e-sitam zahr meñ bujhā ke piyūñ
gale meñ lagtī hai ifrāt-e-shauq se phāñsī
paḌe na halq meñ phandā to DagDagā ke piyūñ
hai ek sāġhar-e-dil aur hazār-rañg kī mai
na ho jo ghar meñ to bāzār se mañgā ke piyūñ
bharosa kar ke maiñ apne rahīm par vaa.iz
maza to jab hai ki tujh ko jalā jalā ke piyūñ
talab se aar hai itnī ki pyaas gar na bujhe
jigar ke ḳhuun ko paanī banā banā ke piyūñ
nigāh-e-shauq mirī ruuh khīñch letī hai
nahīñ vo riñd ki sāġhar se muñh lagā ke piyūñ
ye shai ki jis se nigāhoñ ko rashk dil ko surūr
chhupā chhupā ke uñDelūñ dikhā dikhā ke piyūñ
gunāhgār sahī chor maiñ nahīñ zāhid
hai ye bhī kufr ki ka.abe se muñh phirā ke piyūñ
na riñd-e-tañg-nazar 'ārzū' na tanhā-ḳhor
jo zahr bhī ho mayassar to maiñ pilā ke piyūñ
piyun hi kyun jo bura jaanun aur chhupa ke piyun
main wo nahin ki nigahen bacha bacha ke piyun
miTa diye hain sab ehsas uf re zauq-e-sharab
surur kam na ho turshi bhi gar mila ke piyun
gunah pe tohmat-e-be-lazzati na rakh zahid
maza na aae to kyun munh bana bana ke piyun
ye tishnagi-e-shahadat ka iqtiza ab hai
ki aab-e-tegh-e-sitam zahr mein bujha ke piyun
gale mein lagti hai ifraat-e-shauq se phansi
paDe na halq mein phanda to DagDaga ke piyun
hai ek saghar-e-dil aur hazar-rang ki mai
na ho jo ghar mein to bazar se manga ke piyun
bharosa kar ke main apne rahim par waiz
maza to jab hai ki tujh ko jala jala ke piyun
talab se aar hai itni ki pyas gar na bujhe
jigar ke KHun ko pani bana bana ke piyun
nigah-e-shauq meri ruh khinch leti hai
nahin wo rind ki saghar se munh laga ke piyun
ye shai ki jis se nigahon ko rashk dil ko surur
chhupa chhupa ke unDelun dikha dikha ke piyun
gunahgar sahi chor main nahin zahid
hai ye bhi kufr ki kabe se munh phira ke piyun
na rind-e-tang-nazar 'arzu' na tanha-KHor
jo zahr bhi ho mayassar to main pila ke piyun
Source:
Nishaan-e-Aarzu (Pg. ebook-52 page-44)
-
Author:
Anwar Husain Arzoo
-
- Year of Publication: 1968
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.