purane ghar ko giraya to bap rone laga

purāne ghar ko girāyā to baap rone lagā

ḳhushī ne dil sā dukhāyā to baap rone lagā

jo ammī na rahīñ to kyā huā ki ham sab haiñ

javāb ban nahīñ paayā to baap rone lagā

ye raat khāñste rahte haiñ koft hotī hai

bahū ne sab meñ jatāyā to baap rone lagā

biThā ke rikshe meñ kal shab ravāna karte hue

diyā jo maiñ ne kirāya to baap rone lagā

hameñ banā diye kamre ḳhud us ko T v par

madīna jab nazar aayā to baap rone lagā

kal us ke dost ko bāhar se Tālne ke baad

use faqīr batāyā to baap rone lagā

bahan ravāngī se pahle pyaar lene ga.ī

jo kuchh bhī de nahīñ paayā to baap rone lagā

kiyā hī kyā hai bhalā aaj tak hamāre liye

savāl jūñhī uThāyā to baap rone lagā

tabīb kahtā thā pāgal ko kuchh bhī yaad nahīñ

gale se maiñ ne lagāyā to baap rone lagā

na jaane 'qais' ne kis jazbe se ye kyā likkhā

ki jūñhī paḌh ke sunāyā to baap rone lagā

purane ghar ko giraya to bap rone laga

KHushi ne dil sa dukhaya to bap rone laga

jo ammi na rahin to kya hua ki hum sab hain

jawab ban nahin paya to bap rone laga

ye raat khanste rahte hain koft hoti hai

bahu ne sab mein jataya to bap rone laga

biTha ke rikshe mein kal shab rawana karte hue

diya jo main ne kiraya to bap rone laga

hamein bana diye kamre KHud us ko T w par

madina jab nazar aaya to bap rone laga

kal us ke dost ko bahar se Talne ke baad

use faqir bataya to bap rone laga

bahan rawangi se pahle pyar lene gai

jo kuchh bhi de nahin paya to bap rone laga

kiya hi kya hai bhala aaj tak hamare liye

sawal junhi uThaya to bap rone laga

tabib kahta tha pagal ko kuchh bhi yaad nahin

gale se main ne lagaya to bap rone laga

na jaane 'qais' ne kis jazbe se ye kya likkha

ki junhi paDh ke sunaya to bap rone laga