putli ki ewaz hun but-e-rana-e-banaras

putlī kī evaz huuñ but-e-ra.anā-e-banāras

allāh phir in āñkhoñ ko dikhlā.e banāras

rotā huuñ banāras ke tasavvur meñ shab-o-roz

ai hindūo dekho ye hai dariyā-e-banāras

merī ye vasiyyat se ki mar jā.ūñ agar maiñ

to bād-e-sabā ḳhaak ko pahuñchā.e banāras

hai ka.aba-e-maqsūd faqat kūcha-e-dil-dār

kāfir huuñ jo mujh ko ho tamannā-e-banaras

nāzim ho mohammad kā agar lucknow jā.ūñ

is mulk meñ huuñ ma.adilat-ārā-e-banaras

ka.abe meñ du'ā māñgūñgā maiñ apne ḳhudā se

yārab but-e-kāfir mujhe bulvā.e banāras

bañgal ko ravāna huuñ raqībān-e-siyah-rū

mere liye ho maskan-e-māvā-e-banāras

maiñ ḳhush huuñ tū ābād rahe varna ilāhī

phir piipe se bārūt ke oḌh jaa.e banāras

jab se mujhe qismat ne banāras se chhuḌāyā

rahtā hai zabāñ par mire bas haa.e banāras

ik gesuoñ vaale kī mohabbat kā paḌā pech

pahle to na thā mujh ko ye saudā-e-banaras

ai 'mehr' tavārud hoñ jo mazmūñ to bajā hai

maiñ aur 'hazīñ' donoñ haiñ shohdā-e-banāras

putli ki ewaz hun but-e-rana-e-banaras

allah phir in aankhon ko dikhlae banaras

rota hun banaras ke tasawwur mein shab-o-roz

ai hinduo dekho ye hai dariya-e-banaras

meri ye wasiyyat se ki mar jaun agar main

to baad-e-saba KHak ko pahunchae banaras

hai kaba-e-maqsud faqat kucha-e-dil-dar

kafir hun jo mujh ko ho tamanna-e-banaras

nazim ho mohammad ka agar lucknow jaun

is mulk mein hun madilat-ara-e-banaras

kabe mein du'a mangunga main apne KHuda se

yarab but-e-kafir mujhe bulwae banaras

bangal ko rawana hun raqiban-e-siyah-ru

mere liye ho maskan-e-mawa-e-banaras

main KHush hun tu aabaad rahe warna ilahi

phir pipe se barut ke oDh jae banaras

jab se mujhe qismat ne banaras se chhuDaya

rahta hai zaban par mere bas hae banaras

ek gesuon wale ki mohabbat ka paDa pech

pahle to na tha mujh ko ye sauda-e-banaras

ai 'mehr' tawarud hon jo mazmun to baja hai

main aur 'hazin' donon hain shohda-e-banaras