qafila utra sahra mein aur pesh wahi manzar aae

qāfila utrā sahrā meñ aur pesh vahī manzar aa.e

raakh uḌī ḳhema-gāhoñ kī ḳhuun meñ luThḌe sar aa.e

galiyoñ meñ ghamsān kā ran hai ma.arka dast-ba-dast hai yaañ

jise bhī ḳhud par naaz bahut ho āñgan se bāhar aa.e

ik aaseb sā lahrātā hai bastī kī shah-rāhoñ par

shaam Dhale jo ghar se nikle lauT ke phir nahīñ ghar aa.e

dinoñ mahīnoñ āñkheñ roiiñ na.ī rutoñ kī ḳhvāhish meñ

rut badlī to sūkhe patte dahlīzoñ meñ dar aa.e

ek diyā raushan rakhnā dīvār pe chāñd sitāroñ sā

abr uThe bārish barse yā havāoñ kā lashkar aa.e

varna kis ne paar kiyā thā rasta bharī dopahroñ kā

kuchh ham se dīvāne the jo tai ye masāfat kar aa.e

qafila utra sahra mein aur pesh wahi manzar aae

rakh uDi KHema-gahon ki KHun mein luThDe sar aae

galiyon mein ghamsan ka ran hai marka dast-ba-dast hai yan

jise bhi KHud par naz bahut ho aangan se bahar aae

ek aaseb sa lahraata hai basti ki shah-rahon par

sham Dhale jo ghar se nikle lauT ke phir nahin ghar aae

dinon mahinon aankhen roin nai ruton ki KHwahish mein

rut badli to sukhe patte dahlizon mein dar aae

ek diya raushan rakhna diwar pe chand sitaron sa

abr uThe barish barse ya hawaon ka lashkar aae

warna kis ne par kiya tha rasta bhari dopahron ka

kuchh hum se diwane the jo tai ye masafat kar aae