qafas-nasibon ko taDpa gai hawa-e-bahaar

qafas-nasīboñ ko taḌpā ga.ī havā-e-bahār

chhurī sī dil pe chalī jab chalī havā-e-bahār

koī to jur.a-kash-e-jām-e-arġhavānī ho

kisī ko hijr ke ġham meñ lahū rulā.e bahār

havā meñ āj-kal ik dhīmī dhīmī vahshat hai

isī zamāne se shāyad hai ibtidā-e-bahār

nasīm sehn-e-chaman meñ pachhāḌeñ khātī hai

to dil ko aur bhī taḌpātī hai adā-e-bahār

qafas pe rakhiyo na sayyād baar phūloñ kā

kahīñ asīroñ ko zālim na yaad aa.e bahār

khaḌī huī hai asā Teke nargis-e-bīmār

is intizār meñ hai dekhiye kab aa.e bahār

safed bāloñ pe kyā rañg de rahā hai ḳhizāb

ab ibtidā-e-ḳhizāñ hai aur intihā-e-bahār

qafas-nasibon ko taDpa gai hawa-e-bahaar

chhuri si dil pe chali jab chali hawa-e-bahaar

koi to jura-kash-e-jam-e-arghawani ho

kisi ko hijr ke gham mein lahu rulae bahaar

hawa mein aaj-kal ek dhimi dhimi wahshat hai

isi zamane se shayad hai ibtida-e-bahaar

nasim sehn-e-chaman mein pachhaDen khati hai

to dil ko aur bhi taDpati hai ada-e-bahaar

qafas pe rakhiyo na sayyaad bar phulon ka

kahin asiron ko zalim na yaad aae bahaar

khaDi hui hai asa Teke nargis-e-bimar

is intizar mein hai dekhiye kab aae bahaar

safed baalon pe kya rang de raha hai KHizab

ab ibtida-e-KHizan hai aur intiha-e-bahaar