qayamat aaegi mana ye hadisa hoga

qayāmat aa.egī maanā ye hādisa hogā

magar chhupā huā manzar to rūnumā hogā

musāhiboñ meñ ghire hoñge zill-e-sub.hānī

ġhanīm shahr ko tārāj kar rahā hogā

abhī fazā meñ thī ik tez raushnī kī lakīr

na jaane TuuT ke taarā kahāñ girā hogā

aziiz mujh se thā in.aam mere sar kā use

ra.iis ek hī shab meñ vo ho gayā hogā

huī jo baat to vo aam aadmī niklā

gumān thā ki na.e ruḳh se sochtā hogā

rahegā sāmne kab tak ye nīlgūñ manzar

ye āsmān kahīñ ḳhatm to huā hogā

ajab safar hai mujhe bhī patā nahīñ 'az.har'

ki agle moḌ pe kirdār merā kyā hogā

qayamat aaegi mana ye hadisa hoga

magar chhupa hua manzar to runuma hoga

musahibon mein ghire honge zill-e-subhani

ghanim shahr ko taraj kar raha hoga

abhi faza mein thi ek tez raushni ki lakir

na jaane TuT ke tara kahan gira hoga

aziz mujh se tha inam mere sar ka use

rais ek hi shab mein wo ho gaya hoga

hui jo baat to wo aam aadmi nikla

guman tha ki nae ruKH se sochta hoga

rahega samne kab tak ye nilgun manzar

ye aasman kahin KHatm to hua hoga

ajab safar hai mujhe bhi pata nahin 'azhar'

ki agle moD pe kirdar mera kya hoga