ranai-e-kaunain se be-zar hamin the

rānā.i-e-kaunain se be-zār hamīñ the

ham the tire jalvoñ ke talabgār hamīñ the

hai farq talabgār o parastār meñ ai dost

duniyā thī talabgār parastār hamīñ the

is banda-navāzī ke tasadduq sar-e-mahshar

goyā tirī rahmat ke sazā-vār hamīñ the

de de ke nigāhoñ ko tasavvur kā sahārā

rātoñ ko tire vāste bedār hamīñ the

bazār-e-azal yuuñ to bahut garm thā lekin

le de ke mohabbat ke ḳharīdār hamīñ the

khaTke haiñ tire saare gulistāñ kī nazar meñ

sab apnī jagah phuul the ik ḳhaar hamīñ the

haañ aap ko dekhā thā mohabbat se hamīñ ne

jī saare zamāne ke gunahgār hamīñ the

hai aaj vo sūrat ki banā.e nahīñ bantī

kal naqsh-e-do-ālam ke qalamkār hamīñ the

pachhtāoge dekho hameñ begāna samajh kar

mānoge kisī vaqt ki ġham-ḳhvār hamīñ the

arbāb-e-vatan ḳhush haiñ hameñ dil se bhulā kar

jaise nigah o dil pe bas ik baar hamīñ the

'ehsān' hai be-sūd gila un kī jafā kā

chāhā thā unheñ ham ne ḳhatā-vār hamīñ the

ranai-e-kaunain se be-zar hamin the

hum the tere jalwon ke talabgar hamin the

hai farq talabgar o parastar mein ai dost

duniya thi talabgar parastar hamin the

is banda-nawazi ke tasadduq sar-e-mahshar

goya teri rahmat ke saza-war hamin the

de de ke nigahon ko tasawwur ka sahaara

raaton ko tere waste bedar hamin the

bazar-e-azal yun to bahut garm tha lekin

le de ke mohabbat ke KHaridar hamin the

khaTke hain tere sare gulistan ki nazar mein

sab apni jagah phul the ek KHar hamin the

han aap ko dekha tha mohabbat se hamin ne

ji sare zamane ke gunahgar hamin the

hai aaj wo surat ki banae nahin banti

kal naqsh-e-do-alam ke qalamkar hamin the

pachhtaoge dekho hamein begana samajh kar

manoge kisi waqt ki gham-KHwar hamin the

arbab-e-watan KHush hain hamein dil se bhula kar

jaise nigah o dil pe bas ek bar hamin the

'ehsan' hai be-sud gila un ki jafa ka

chaha tha unhen hum ne KHata-war hamin the