rasta KHwab ke andar se nikalta hua tha

rāsta ḳhvāb ke andar se nikaltā huā thā

koī kyā ḳhvāb ke andar se nikaltā huā thā

vo mahak thī ki mujhe niiñd sī aane lagī thī

phuul sā ḳhvāb ke andar se nikaltā huā thā

ye kisī ḳhvāb kā ahvāl nahīñ hai ki maiñ ḳhvāb

dekhtā ḳhvāb ke andar se nikaltā huā thā

ḳhvāb the jaise parindoñ ne pare bāñdhe hoñ

silsila ḳhvāb ke andar se nikaltā huā thā

mujh ko duniyā ke samajhne meñ zarā der lagī

maiñ zarā ḳhvāb ke andar se nikaltā huā thā

nazar uThtī thī jidhar bhī mirī manzar manzar

zāviya ḳhvāb ke andar se nikaltā huā thā

vo nikaltā huā thā ḳhvāb-kade se apne

ḳhvāb thā ḳhvāb ke andar se nikaltā huā thā

ik sirā jā ke pahuñchtā thā tirī yādoñ tak

dūsrā ḳhvāb ke andar se nikaltā huā thā

kyā batā.ūñ koī īmān kahāñ lā.egā

ki ḳhudā ḳhvāb ke andar se nikaltā huā thā

sub.h jab aañkh khulī logoñ kī logoñ pe khulā

jo bhī thā ḳhvāb ke andar se nikaltā huā thā

rasta KHwab ke andar se nikalta hua tha

koi kya KHwab ke andar se nikalta hua tha

wo mahak thi ki mujhe nind si aane lagi thi

phul sa KHwab ke andar se nikalta hua tha

ye kisi KHwab ka ahwal nahin hai ki main KHwab

dekhta KHwab ke andar se nikalta hua tha

KHwab the jaise parindon ne pare bandhe hon

silsila KHwab ke andar se nikalta hua tha

mujh ko duniya ke samajhne mein zara der lagi

main zara KHwab ke andar se nikalta hua tha

nazar uThti thi jidhar bhi meri manzar manzar

zawiya KHwab ke andar se nikalta hua tha

wo nikalta hua tha KHwab-kade se apne

KHwab tha KHwab ke andar se nikalta hua tha

ek sira ja ke pahunchta tha teri yaadon tak

dusra KHwab ke andar se nikalta hua tha

kya bataun koi iman kahan laega

ki KHuda KHwab ke andar se nikalta hua tha

subh jab aankh khuli logon ki logon pe khula

jo bhi tha KHwab ke andar se nikalta hua tha