raat guzri ki shab-e-wasl ka paigham mila

raat guzrī ki shab-e-vasl kā paiġhām milā

so ga.e ḳhvāb kī bāñhoñ meñ jo ārām milā

DhūñDte rahiye shab-o-roz umīdoñ ke qadam

kūcha-e-zīst meñ le de ke yahī kaam milā

ḳhūbi-e-baḳht ki jab bhuul chukā thā sab kuchh

bevafā.ī kā lab-e-ġhair se ilzām milā

pā-piyāda thā magar raah meñ vo dhuum machī

jhuk ke tāzīm se shahzāda-e-ayyām milā

ham ne bechī nahīñ jis roz matā-e-ġhairat

ik piyāla bhī na mai kā hameñ us shaam milā

muḳhtasar ye hai ki jab vaqt-e-vidā-e-gul thā

ḳhvāb meñ aa ke gale mujh se vo gulfām milā

ham junūñ hai ki nahīñ raah meñ pūchheñge 'na.īm'

dasht-e-ġhurbat meñ ye kyā kam hai ki hamnām milā

raat guzri ki shab-e-wasl ka paigham mila

so gae KHwab ki banhon mein jo aaram mila

DhunDte rahiye shab-o-roz umidon ke qadam

kucha-e-zist mein le de ke yahi kaam mila

KHubi-e-baKHt ki jab bhul chuka tha sab kuchh

bewafai ka lab-e-ghair se ilzam mila

pa-piyaada tha magar rah mein wo dhum machi

jhuk ke tazim se shahzada-e-ayyam mila

hum ne bechi nahin jis roz mata-e-ghairat

ek piyala bhi na mai ka hamein us sham mila

muKHtasar ye hai ki jab waqt-e-wida-e-gul tha

KHwab mein aa ke gale mujh se wo gulfam mila

hum junun hai ki nahin rah mein puchhenge 'naim'

dasht-e-ghurbat mein ye kya kam hai ki hamnam mila