raaz-e-dil kyun na kahun samne diwanon ke

rāz-e-dil kyuuñ na kahūñ sāmne dīvānoñ ke

ye to vo log haiñ apnoñ ke na begānoñ ke

vo bhī kyā daur the saaqī tire mastānoñ ke

rāste raah takā karte the mai-ḳhānoñ ke

bādaloñ par ye ishāre tire dīvānoñ ke

TukḌe pahuñche haiñ kahāñ uḌ ke garebānoñ ke

rāste band kiye dete ho dīvānoñ ke

Dher lag jā.eñge bastī meñ garebānoñ ke

na azaañ detā na hushiyār barahman hotā

dar to us shaiḳh ne khulvā.e haiñ but-ḳhānoñ ke

aap din-rāt sañvārā kareñ gesū to kyā

kahīñ hālāt badalte haiñ pareshānoñ ke

man.a kar girya-e-shabnam pe na ye phuul hañseñ

laale paḌ jā.eñge ai bād-e-sabā jānoñ ke

kyā zamāna thā udhar shaam idhar haath meñ jaam

sub.h tak daur chalā karte the paimānoñ ke

vo bhī kyā din the udhar shaam idhar haath meñ jaam

ab to raste bhī rahe yaad na mai-ḳhānoñ ke

aaj tak to mirī kashtī ne na paa.ī manzil

qāfile saiñkaḌoñ gum ho ga.e tūfānoñ ke

ḳhāk-e-sahrā pe lakīreñ haiñ unheñ phir dekho

kahīñ ye ḳhat na hoñ likkhe hue dīvānoñ ke

dekhiye charḳh pe taare bhī haiñ kyā be-tartīb

jaise bikhre hue TukḌe mire paimānoñ ke

haath ḳhālī haiñ magar mulk-e-adam kā hai safar

hausle dekhiye un be-sar-o-sāmānoñ ke

sar jhukā.e hue baiThe haiñ jo ka.abe meñ 'qamar'

aise hote haiñ nikāle hue but-ḳhānoñ ke

raaz-e-dil kyun na kahun samne diwanon ke

ye to wo log hain apnon ke na beganon ke

wo bhi kya daur the saqi tere mastanon ke

raste rah taka karte the mai-KHanon ke

baadalon par ye ishaare tere diwanon ke

TukDe pahunche hain kahan uD ke garebanon ke

raste band kiye dete ho diwanon ke

Dher lag jaenge basti mein garebanon ke

na azan deta na hushiyar barahman hota

dar to us shaiKH ne khulwae hain but-KHanon ke

aap din-raat sanwara karen gesu to kya

kahin haalat badalte hain pareshanon ke

mana kar girya-e-shabnam pe na ye phul hansen

lale paD jaenge ai baad-e-saba jaanon ke

kya zamana tha udhar sham idhar hath mein jam

subh tak daur chala karte the paimanon ke

wo bhi kya din the udhar sham idhar hath mein jam

ab to raste bhi rahe yaad na mai-KHanon ke

aaj tak to meri kashti ne na pai manzil

qafile sainkaDon gum ho gae tufanon ke

KHak-e-sahra pe lakiren hain unhen phir dekho

kahin ye KHat na hon likkhe hue diwanon ke

dekhiye charKH pe tare bhi hain kya be-tartib

jaise bikhre hue TukDe mere paimanon ke

hath KHali hain magar mulk-e-adam ka hai safar

hausle dekhiye un be-sar-o-samanon ke

sar jhukae hue baiThe hain jo kabe mein 'qamar'

aise hote hain nikale hue but-KHanon ke