raaz mein rakkhenge hum teri qasam ai naseh

raaz meñ rakkheñge ham terī qasam ai nāseh

le nikāl ab vahī gāñje kī chilam ai nāseh

ab ḳhudā ke liye rakh ham pe karam ai nāseh

haiñ pareshāñ tirī bakvās se ham ai nāseh

jhurriyāñ ruḳh kī jo paiġhām-e-qazā laa.ī haiñ

kab talak jāoge tum sū-e-adam ai nāseh

bāda-noshoñ ko na samjhāne kī koshish karnā

varna phir hogā tirā naak meñ dam ai nāseh

ba.ad muddat ke milā hai to chalā-chal mire saath

mai-kada yaañ se hai bas chaar qadam ai nāseh

pūchh le biitī hai kyā rindoñ ke hāthoñ in par

ye jo haiñ tere chachā shaiḳh-e-haram ai nāseh

kyā huā ḳhair to hai kaisī musībat aa.ī

kis ne maarā tujhe kyuuñ aañkh hai nam ai nāseh

bhuul kar bhī kabhī muñh un ke na lagnā nādāñ

kuchh ḳhabar hai baḌe beDhab haiñ ni.am ai nāseh

tujh ko bhī ishq-e-butāñ kā maza kuchh ho ma.alūm

tere palle hoñ agar dām-o-diram ai nāseh

tū hai kyā saarā jahāñ ḳhauf se kaañp uThtā hai

'shauq' uThāte haiñ jo shamshīr-e-qalam ai nāseh

raaz mein rakkhenge hum teri qasam ai naseh

le nikal ab wahi ganje ki chilam ai naseh

ab KHuda ke liye rakh hum pe karam ai naseh

hain pareshan teri bakwas se hum ai naseh

jhurriyan ruKH ki jo paigham-e-qaza lai hain

kab talak jaoge tum su-e-adam ai naseh

baada-noshon ko na samjhane ki koshish karna

warna phir hoga tera nak mein dam ai naseh

baad muddat ke mila hai to chala-chal mere sath

mai-kada yan se hai bas chaar qadam ai naseh

puchh le biti hai kya rindon ke hathon in par

ye jo hain tere chacha shaiKH-e-haram ai naseh

kya hua KHair to hai kaisi musibat aai

kis ne mara tujhe kyun aankh hai nam ai naseh

bhul kar bhi kabhi munh un ke na lagna nadan

kuchh KHabar hai baDe beDhab hain niam ai naseh

tujh ko bhi ishq-e-butan ka maza kuchh ho malum

tere palle hon agar dam-o-diram ai naseh

tu hai kya sara jahan KHauf se kanp uThta hai

'shauq' uThate hain jo shamshir-e-qalam ai naseh